الماتىدا جاۋىنگەرلىك داڭق مۋزەيى جاڭارتىلدى: اشىق اسپان استىندا جاڭا ءبولىم اشىلدى
الماتىدا ۇلتتىق اسكەري-پاتريوتتىق ورتالىقتىڭ جاۋىنگەرلىك داڭق مۋزەيىنىڭ جاڭا «اشىق اسپان استىنداعى مۋزەي» ءبولىمىنىڭ سالتاناتتى اشىلۋ ءراسىمى ءوتتى. ءىس-شارا ارميا ءۇيىنىڭ (بۇرىنعى وفيسەرلەر ءۇيى) اۋماعىندا قازاقستان رەسپۋبليكاسى قورعانىس ءمينيسترىنىڭ ورىنباسارى، گەنەرال-مايور شايح-حاسان جازىقبايەۆ، الماتى قالاسى اكىمىنىڭ ورىنباسارى ازامات قالدىبەكوۆ، قارۋلى كۇشتەردىڭ وكىلدەرى مەن قۇرمەتتى قوناقتاردىڭ قاتىسۋىمەن ۇيىمداستىرىلدى، دەپ حابارلايدى aqshamnews.kz
سالتانات مەملەكەتتىك انۇرانمەن اشىلىپ، قورعانىس مينيسترلىگى مەن قالا اكىمدىگى اتىنان قۇتتىقتاۋ سوزدەر ايتىلدى. جاڭا ەكسپوزيسيانى جاساۋعا اتسالىسقان اسكەري قىزمەتكەرلەر ماراپاتتالدى. ءراسىمنىڭ باستى ءساتى – لەنتانى قيىپ، العاشقى ەكسكۋرسيانىڭ باستالۋى بولدى.
جاڭا ەكسپوزيسيالىق ءبولىم ش.قالداياقوۆ كوشەسى جاعىنداعى اشىق الاڭدا ورنالاسقان. مۇندا 30-دان استام ءتۇپنۇسقا جانە قالپىنا كەلتىرىلگەن اسكەري تەحنيكا ۇلگىلەرى قويىلعان. بارلىق ەكسپونات قالپىنا كەلتىرىلىپ، تەحنيكالىق سيپاتتامالار مەن تاريحي مالىمەتتەر جازىلعان تاقتالارمەن جابدىقتالعان.
ەكسپوزيسيادا جەڭىستىڭ سيمۆولىنا اينالعان ت-34 تانكى، اتى اڭىزعا اينالعان بم-13 «كاتيۋشا» زىمىران تاسىعىشى، سونداي-اق ت-44 جانە ت-55 سياقتى كەڭەستىك تانكىلەر بار. سونىمەن قاتار، بتر-40، بردم-1 جانە بردم-2 برونەترانسپورتەرلەرى، بمپ-1 جاياۋ اسكەردىڭ جاۋىنگەرلىك ماشيناسى، ءارتۇرلى گاۋبيسالار، مينومەتتەر، زەنيتتىك جانە دالالىق ارتيللەريا قۇرالدارى قويىلعان.
كورمەدەگى ەرەكشە قىزىعۋشىلىق تۋدىراتىندار – شەتەلدىك سيرەك ۇلگىلەر: 120 مم «فينۋليانۋ» مينومەتى (شۆەسيا)، 158 مم «كەبەلۆەرح-41» مينومەتى (گەرمانيا) جانە 105 مم M-2A1 HOWITZER گاۋبيساسى (اقش). سونداي-اق، 203 مم بل-39 گاۋبيساسى، 122 مم م-30 گاۋبيساسى، 100 مم بس-3 دالالىق زەڭبىرەگى، زپۋ-2 جانە س-60 زەنيتتىك قۇرىلعىلارى، پم-120 جانە م-240 مينومەتتەرى سىندى ارتيللەريالىق تەحنيكا دا كورمەگە قويىلعان.
جاۋىنگەرلىك داڭق مۋزەيى 1965 جىلى قۇرىلعان جانە ول الماتىداعى اسكەري-پاتريوتتىق تاربيە بەرۋدىڭ ماڭىزدى ورتالىعى سانالادى. مۋزەي توپتاماسى XIX عاسىردان قازىرگى كۇنگە دەيىنگى قازاقستاننىڭ اسكەري تاريحىن قامتيدى. نەگىزگى قور مايدانگەرلەردىڭ ءتۇپنۇسقا قۇجاتتارى، فوتوسۋرەتتەرى، حاتتارى، ماراپاتتارى مەن جەكە زاتتارىنان تۇرادى. ماتەريالداردىڭ ەلەۋلى بولىگىن گەنەرال پانفيلوۆتىڭ قىزى – پانفيلوۆ ديۆيزياسىنىڭ ارداگەرى ۆالەنتينا پانفيلوۆا تاپسىرعان.
مۋزەي الماتى قالاسى، مەدەۋ اۋدانى، زەنكوۆ كوشەسى، 24 مەكەنجايىندا ورنالاسقان. جالپى اۋدانى 1260 شارشى مەتردەن اسادى. مۇندا 15 مامان جۇمىس ىستەيدى، جىل سايىن 25 مىڭنان استام ادام مۋزەيدى تاماشالايدى.