«تازا قازاقستان» رەسپۋبليكالىق باعدارلاماسى جانە «الماتى – ءبىزدىڭ ورتاق ءۇيىمىز» ناۋقانى اياسىندا الماتى قالاسىنىڭ كوممۋنالدىق ينفراقۇرىلىمدى دامىتۋ جانە الماتى قالاسىن سيفرلاندىرۋ باسقارمالارى اراسىندا كەلىسىمگە قول قويىلدى، دەپ حابارلايدى Aqshamnews.kz
كەلىسىم اياسىندا كوممۋنالدىق ينفراقۇرىلىمدى دامىتۋ باسقارماسى Target AYA باعدارلاماسى بويىنشا ۆيدەومونيتورينگ جۇيەسىنە قولجەتكىزدى. بۇل جاڭالىق قالاداعى سانيتارلىق نورمالاردىڭ بۇزىلۋىن تۇراقتى نەگىزدە انىقتاۋعا جانە ولاردى جويۋ ءۇشىن ۋاقتىلى شارالار قابىلداۋعا مۇمكىندىك بەرەدى.
2024 جىلعى 18-24 قازان ارالىعىندا «جارقىن كۇز» قالالىق ناۋقانى كەزىندە ۆيدەومونيتورينگ ناتيجەسىندە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 505-بابىندا بەلگىلەنگەن اباتتاندىرۋ ەرەجەلەرىن ساقتاماعانى ءۇشىن 17 كاسىپكەرلىك وبەكتىدە بۇزۋشىلىقتار انىقتالدى. الماتى قالاسىنىڭ كوممۋنالدىق ينفراقۇرىلىمدى دامىتۋ جانە تابيعاتتى قورعاۋ پوليسياسى باسقارماسىنىڭ قىزمەتكەرلەرى نىساندارعا جەدەل بارىپ، بۇزۋشىلارعا اۋىزشا ەسكەرتۋ جاسادى.
بۇل ىرگەلەس اۋماقتاردىڭ جاي-كۇيى ءۇشىن كاسىپكەرلەردىڭ جاۋاپكەرشىلىك دەڭگەيىن ارتتىرۋعا باعىتتالعان اباتتاندىرۋدىڭ جاڭا ەرەجەلەرىن ەنگىزۋدىڭ ارقاسىندا مۇمكىن بولدى.
اباتتاندىرۋ قاعيدالارىنىڭ نەگىزگى باعىتتارىنىڭ ءبىرى كاسىپكەرلىك وبەكتىلەرىن پاسپورتتاۋ بولىپ تابىلادى. بۇل پروسەستىڭ ءماقساتى-اربىر كاسىپكەر ءۇشىن ىرگەلەس اۋماقتاردى اباتتاندىرۋ جاۋاپكەرشىلىگىنىڭ شەكاراسىن انىقتاۋ. كوممۋنالدىق ينفراقۇرىلىمدى دامىتۋ باسقارماسىنىڭ دەرەكتەرى بويىنشا قالادا 5 590 كاسىپكەرلىك نىسانى پاسپورتتالۋعا جاتادى. قازىرگى ۋاقىتتا مىڭنان استام كاسىپكەر پاسپورتتارعا قول قويدى.
پاسپورتتاۋ بويىنشا بارلىق جۇمىستاردى اياقتاۋ 2025 جىلدىڭ ساۋىرىنە جوسپارلانعان. باعدارلاما اياسىندا كاسىپكەرلەر ىرگەلەس اۋماقتاردى رەتكە كەلتىرۋمەن قاتار، عيماراتتاردىڭ قاسبەتتەرىن كۇتۋ، تازالىقتى ساقتاۋ جانە كوممۋنالدىق قالدىقتاردى ۋاقتىلى شىعارۋ جونىندەگى تالاپتاردى ساقتاۋعا مىندەتتى.
ۆيدەومونيتورينگ جۇيەسى جانە جاڭا اباتتاندىرۋ ەرەجەلەرى ءومىر ءسۇرۋ ءۇشىن قولايلى جاعداي جاساۋعا كومەكتەسەدى. ەرەجەنى بۇزعان كاسىپكەرلەر ق ر اكىمشىلىك قۇقىق بۇزۋشىلىق تۋرالى كودەكسىنە سايكەس اكىمشىلىك جاۋاپكەرشىلىككە تارتىلاتىن بولادى.