استانا مەن اتىراۋ دا وسى قاتاردا.
ۇلتتىق بانكتىڭ مالىمدەۋىنشە، قاڭتاردا 2300-دەن استام التىن قۇيماسى ساتىلدى، دەپ حابارلايدى Almaty-akshamy.kz
2023 جىلدىڭ قاڭتار ايىندا ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرىندە جالپى سالماعى 79،5 كەلى 2 364 التىن قۇيما ساتىلعان.
حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن (بۇدان ءارى – باعدارلاما) ۇلتتىق بانك 2017 جىلى ىسكە قوسقان بولاتىن. باعدارلاما قولعا الىنعالى جالپى سالماعى 3،9 توننا 115 209 التىن قۇيما ساتىلدى.
"التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گ. ساتىپ الۋشىلار اراسىندا سۇرانىسقا يە ءتۇرى – 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى 26% – 29 723 دانا. ودان كەيىن 5 گرامدىق التىن قۇيما – 25 538 دانا (22%)، 100 گرامدىق قۇيما – 23 460 دانا (20%)، 20 گرامدىق قۇيما – 23 131 دانا (20%)، جانە 50 گراممدىق قۇيما – 13 357 دانا (12%). التىن قۇيمالار الماتى، استانا جانە اتىراۋ قالالارىندا كوپ ساتىلادى"، – دەپ جازىلعان ۇلتتىق بانك تاراتقان حابارلامادا.
التىن قۇيما – سەنىمدى ينۆەستيسيا قۇرالى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، قۇيمالاردى كەرى ساتىپ الا الادى.
باعدارلاما باستالعاننان بەرى ەكىنشى دەڭگەيلى بانكتەر مەن بانكتىك ەمەس جەكەلەگەن پۋنكتەر جالپى سالماعى 484،6 كەلى 19 228 التىن قۇيمانى كەرى ساتىپ الدى، بۇل – جالپى ساتىلعان قۇيمالاردىڭ 17%-ى. كەرى ساتىپ الىنعان قۇيمالاردىڭ بارلىعى ۇلتتىق بانكتىڭ اۋماقتىق فيليالدارى ارقىلى حالىققا ساتىلادى.
"ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە جيەگى بار) جانە ارنايى قوراپپەن شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ ساپا سەرتيفيكاتى بولىپ تا سانالادى. سوندىقتان، التىن قۇيمانى ۇقىپپەن ساقتاپ، قورابىن بۇلدىرمەۋگە كەڭەس بەرەمىز"، – دەپ حابارلادى ۇب.