بۇل - بەس اي ىشىندە اتقارعان جۇمىستاردىڭ ناتيجەسى.
الماتى قالاسى ءماسليحاتىنىڭ XXV سەسسياسى بارىسىندا «الماتى قالاسىن 2025 جىلعا دەيىنگى دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالار» (بۇدان ءارى – دامۋ باعدارلاماسى) بەكىتىلدى. وتىرىسقا الماتى قالاسىنىڭ اكىمى ەربولات دوسايەۆ، اكىمنىڭ ورىنباسارلارى، باسقارما باسشىلارى، ءماسليحات دەپۋتاتتارى، قوعامدىق كەڭەس مۇشەلەرى جانە ساراپشىلار قاۋىمداستىعىنىڭ وكىلدەرى قاتىستى، دەپ حابارلايدى Almaty-akshamy.kz.
دامۋ باعدارلاماسىن دايىنداۋ كەزىندە قولدانىستاعى ستراتەگيالىق جوسپارلار، حالىقارالىق تاجىريبە، الەمدىك مەگاپوليستەردى دامىتۋ قاعيداتتارى زەردەلەندى، قالا ءومىرىنىڭ بارلىق سالالارىنداعى احۋال تالداندى، سىن-قاتەرلەر ەسكەرىلدى، تۇرعىنداردىڭ مىڭداعان وتىنىشتەرى وڭدەلدى.
دامۋ باعدارلاماسى - الماتى اكىمدىگىنىڭ جانە ءتۇرلى قىزمەت سالالارىنان تارتىلعان ماماندانعان 130-دان استام ساراپشىلاردىڭ 5 اي ىشىندە اتقارعان جۇمىستارىنىڭ ناتيجەسى. باعدارلاما الماتى تۇرعىندارىنىڭ ۇسىنىستارىنا نەگىزدەلدى - اعىمداعى جىلدىڭ شىلدە ايىندا قالا تۇرعىندارى دامۋ باعدارلاماسىنىڭ نەگىزگى باسىمدىقتارىنا 1280 تۇسىنىكتەمە جىبەردى. ءوزىنىڭ سوزىندە ەربولات دوسايەۆ الماتىنىڭ بارلىق تۇرعىندارىنا باعدارلامانى تالداۋعا بەلسەندى قاتىسقاندارى ءۇشىن العىس ءبىلدىردى.
دامۋ باعدارلاماسىنىڭ بازالىق قاعيداتتارى - جايلى قالالىق ورتا قۇرۋ جانە الماتىنىڭ بارلىق اۋداندارىندا ءومىر ءسۇرۋ ساپاسىن ارتتىرۋ بولىپ تابىلادى.
دامۋ باعدارلاماسىندا 7 نەگىزگى باعىت ايقىندالعان:
- جايلى قالالىق ورتا؛
- ورنىقتى ەكونوميكالىق ءوسۋ؛
- باسقارىلاتىن ۋرباندالۋ؛
- الەۋمەتتىك ورنىقتىلىق پەن تۇراقتىلىق؛
- جاسىل الماتى؛
- سمارت سيتي؛
- ءقاۋىپسىز قالا.
وتىرىس بارىسىندا باعىتتاردىڭ ءارقايسىسى تۋرالى الماتى اكىمىنىڭ ورىنباسارلارى مەن سيفرلاندىرۋ باسقارماسىنىڭ باسشىسى تولىق باياندادى.
«الماتى قالاسىن 2025 جىلعا دەيىنگى دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالار» الماتى قالاسى سايتىندا جاريالاندى.
سونىمەن قاتار سەسسيادا ءبىرقاتار نورماتيۆتىك-قۇقىقتىق اكتىلەر قابىلداندى.