الماتىدا العاش رەت جۇكتى ايەلگە جۇرەككە رەنتگەن ساۋلەسىن قولدانباي ەندوۆاسكۋليارلىق وتا جاسالدى.
بىرەگەي وتانى قالالىق كارديولوگيا ورتالىعىنىڭ دارىگەرلەرى استاناداعى UMC جۇرەك ورتالىعىنىڭ ماماندارىمەن بىرلەسىپ وتكىزدى.
دەنساۋلىق ساقتاۋ مينيسترلىگىنىڭ حابارلاۋىنشا، جۇكتىلىكتىڭ 23-اپتاسىندا جۇرگەن ايەلگە جاسالعان. دارىگەرلەر تۋا بىتكەن جۇرەك اقاۋىن ەحوكارديوگرافيانىڭ كومەگىمەن، رەنتگەنسىز جانە جەرگىلىكتى جانسىزداندىرۋمەن ەمدەدى. بۇل انا مەن ۇرىققا رەنتگەن ساۋلەسىنىڭ اسەرىن تولىقتاي بولدىرمادى.
ناۋقاس تۇڭعىش ءسابيىن كۇتىپ جۇرگەن جانە تىركەلگەن ەمحاناسىندا كارديولوگتىڭ تۇراقتى باقىلاۋىندا بولعان. الايدا جۇكتىلىك مەرزىمى ۇلعايعان سايىن جۇرەك-قان تامىرلارىنا تۇسەتىن جۇكتەمەنىڭ ارتۋىنا بايلانىستى جاعدايى ناشارلاپ، وتا قاجەت بولعان.
وپەراسيالىق بريگادانىڭ قۇرامىندا UMC جۇرەك ورتالىعىنىڭ ينتەرۆەنسيالىق كارديولوگى ەرىك وتاربايەۆ، سونداي-اق قالالىق كارديولوگيا ورتالىعىنىڭ ماماندارى — ورازبەك ساحوۆ پەن باۋىرجان ايپوۆ بولدى.
— وپەراسيانىڭ باستى ەرەكشەلىگى رەنتگەن ساۋلەلەرىن قولدانباي ۋلترادىبىستىق باقىلاۋمەن ارالاسۋ بولدى. قالىپتى تاجىريبەدە مۇنداي وپەراسيالار جۇكتىلىك كەزىندە ۇرىققا ىقتيمال ءقاۋىپ توندىرەتىن رەنتگەندىك باقىلاۋمەن جاسالادى. ۋلترادىبىستىق ناۆيگاسيانى قولدانۋ رادياسيالىق جۇكتەمەنى تولىعىمەن الىپ تاستاۋعا جانە انا ءۇشىن دە، بولاشاق بالا ءۇشىن دە قاۋىپسىزدىكتى قامتاماسىز ەتۋگە مۇمكىندىك بەردى، - دەلىنگەن حابارلامادا.
ۆەدومستۆونىڭ مالىمەتىنشە، قازىرگى ۋاقىتتا ناۋقاستىڭ جاعدايى تۇراقتى. انا مەن ۇرىقتىڭ ءومىرى مەن دەنساۋلىعىنا ءقاۋىپ جوق.