وقۋشىلار سارايىندا «قازاقستانداعى بالالار ۇيلەرى تۇلەكتەرىنىڭ قاۋىمداستىعى» زاڭدى تۇلعالار بىرلەستىگى مەن قالالىق ءبىلىم باسقارماسىنىڭ ۇيىمداستىرۋىمەن الەۋمەتتىك مەكەمەلەردە تاربيەلەنىپ جاتقان بالالارعا ارنالعان مەرەكەلىك ءىس-شارا ءوتتى. وعان الماتى قالاسىنىڭ ءارتۇرلى الەۋمەتتىك مەكەمەلەرىنەن كەلگەن 400-دەن استام بالا قاتىستى. ولاردىڭ قاتارىندا «مەيىرىم»، «جانۇيا» بالالار ورتالىقتارى، SOS بالالار اۋىلى جانە «باعاناشىل» بالالار ءۇيىنىڭ تاربيەلەنۋشىلەرى بار. جاڭا جىلدىق شىرشا بيىل توعىزىنشى رەت وتكىزىلىپ وتىر.
ءقازىر بۇل ءىس-شارا اتا-انانىڭ قامقورلىعىنسىز قالعان بالالار ءۇشىن جىل سايىن اسىعا كۇتەتىن ماڭىزدى مەرەكەگە اينالدى. ويتكەنى، مۇندا كونسەرتتىك قويىلىمدار، ويىن-ساۋىق باعدارلامالارى ۇيىمداستىرىلىپ، بارلىق بالاعا جاڭا جىلدىق سىيلىقتار تابىستالدى. ۇيىمداستىرۋشىلاردىڭ ايتۋىنشا، ءىس-شارانىڭ وتۋىنە الماتى قالاسىنىڭ قوعامدىق كەڭەسى، سونداي-اق حالىقارالىق ۇيىم وكىلدەرى دە قولداۋ كورسەتكەن.
«بۇل جاڭا جىلدىق شىرشا – الەۋمەتتىك مەكەمەلەردە تاربيەلەنىپ جاتقان بالالاردىڭ اسىعا كۇتەتىن مەرەكەلەرىنىڭ ءبىرى. بىر-بىرىمەن ەركىن ارالاسىپ، شات-شادىمان كوڭىل كۇيدە مەرەكەنى اتاپ وتەدى»، – دەدى الماتى قالاسى ءبىلىم باسقارماسى باسشىسىنىڭ ورىنباسارى بيبىگۇل تولەپبەرگەنوۆا.
«مەن جاڭا جىل مەن ناۋرىزدى وتە جاقسى كورەمىن. بۇگىن ءبارى قاتتى ۇنادى. اسىرەسە، ۇلكەن ءارى ادەمى شىرشا مەن سىيلىقتار كەرەمەت بولدى»، – دەپ «باعاناشىل» بالالار اۋىلىنان كەلگەن اجار كەنگانوۆا اسەرىن ءبولىستى.