الماتىدا ALMATY CIRCUS FESTIVAL II حالىقارالىق سيرك ونەرى فەستيۆالى اياقتالدى.
سيرك مانەجىندە جۇڭگو، جاپونيا، قازاقستان، ارگەنتينا، برازيليا، پورتۋگاليا، يسپانيا، يتاليا، رەسەي، ۆەتنام، بەلارۋس، وزبەكستان، ۋكراينا، ارمەنيا، تاجىكستان، ياكۋتيا، قىرعىزستان جانە ەفيوپيا سياقتى الەمنىڭ 18 ەلىنەن 80-نەن استام ۇزدىك ارتىستەر ونەر كورسەتتى.
قازاق مەملەكەتتىك سيركىنىڭ ۇجىمى 54 جىلدىعىن اتاپ ءوتتى. وتكەن جىلى، اراعا 35 جىل سالىپ، سيرك ارتيستەرى الماتى قالاسى اكىمدىگىنىڭ قولداۋىمەن شەتەلگە گاسترولدىك ساپارلارىن قايتا باستادى. جۇڭگو مەن رەسەيدىڭ ۇزدىك سيرك مەكتەپتەرىندە بىلىكتىلىگىن ارتتىرىپ، وقۋدان ءوتتى، ەلدەن تىس جەرلەردە بەدەلدى كونكۋرستار مەن فەستيۆالداردا ماراپاتتارعا يە بولدى. ەندى ەكىنشى جىل قاتارىنان اتى اڭىزعا اينالعان قازاق مەملەكەتتىك سيركى حالىقارالىق فەستيۆال وتكىزىپ وتىر.
«ءبىزدىڭ سيركتىڭ جارتى عاسىردان استام تاريحى بار جانە ونىڭ ءوز فەستيۆالى بولۋى كەرەك. ءبىز ارتيستەرىمىزدىڭ جەتىستىكتەرىن ماقتان تۇتامىز. الماتى سيركى حالىقارالىق ارەنادا بەلسەندى جۇمىس ىستەۋدە. ءقازىر اكىمدىك ايرىقشا قولداۋ كورسەتىپ كەلەدى، بۇعان ءبىز وتە قۋانىشتىمىز. ءبىز ۇلكەن جوسپارلاردى جۇزەگە اسىرا وتىرىپ، مادەني ءتۋريزمدى دامىتۋعا ءوز ۇلەسىمىزدى قوسىپ جاتىرمىز. الماتى تۇرعىندارى مەن قوناقتارى الەمنىڭ ۇزدىك ارتيستەرى ۇسىنعان قويىلىمداردى ءوز كوزدەرىمەن كورۋى ءتيىس»، – دەپ اتاپ ءوتتى قازاق مەملەكەتتىك سيركىنىڭ ديرەكتورى ماقسات جايىقوۆ.
ALMATY CIRCUS FESTIVAL اياسىندا ەكۆيليبريستەر، اكروباتتار، اۋە گيمناستتارى، ارقانمەن جۇرۋشىلەر مەن جونگلەرلەر وزدەرىنىڭ كاسىبيلىگى مەن شەبەرلىگىن كورسەتۋدە. كورەرمەندەردى تاڭقالدىرىپ، ۇمىتىلماس شوۋ ۇسىنۋ ءۇشىن ارتيستەر ءقاۋىپتى، قىزىقتى ءارى كۇردەلى تريۋكتەردى ورىندادى. قىزىقتى فاكتىلەردىڭ ءبىرى: قىتايدان كەلگەن قاتىسۋشى ۆان مانچەن وزىمەن بىرگە سالماعى ەكى تونناعا جۋىق اۋقىمدى رەكۆيزيتتەردى الىپ كەلگەن. ايتا كەتەيىك، فەستيۆالدە مارينا ستارودۋبوۆا مەن دايانا جەتپىسوۆا «جاڭبىرداعى ۇشۋ» نومىرىمەن، سونداي-اق نۇرىم قۇلەنبايەۆتىڭ جەتەكشىلىگىمەن جونگلەر-ۆيرتۋوزدار قازاقستان اتىنان ونەر كورسەتتى.
فەستيۆال 28 شىلدەگە دەيىن جالعاستى، ال جەڭىمپازدار مەن جۇلدەگەرلەر الماتىدا قالىپ، تامىز ايىنىڭ سوڭىنا دەيىن مەگاپوليس تۇرعىندارى مەن قوناقتارىنا فەستيۆال باعدارلاماسىمەن ونەر كورسەتەدى. قازاق مەملەكەتتىك سيركىنىڭ ءارى ALMATY CIRCUS FESTIVAL قويىلىمدارىنىڭ باس رەجيسسەرى مارينا رەدكو ارتيستەر ناعىز شوۋ جاساعانىن ايتتى. باعدارلاما قازاقستان ءۇشىن سيرەك كەزدەسەتىن جانرلارمەن قامتىلعان.
«وتكەن جىلى ءبىرىنشى فەستيۆالدە ءتىسپەن تريۋك جاساعان نومىرلەر بولدى. ال وسى جىلى ارتيستەر «اياقپەن»، وكشەمەن وتە كۇردەلى تريۋكتار ورىندادى. ءقازىر جازعى دەمالىس، وسى ۋاقىتتا بالالار مەن ەرەسەكتەر الەمنىڭ ۇزدىك سيرك ارتيستەرى ۇسىنعان قويىلىمداردى تاماشالاعانىن قالايمىن»، – دەپ اتاپ ءوتتى مارينا رەدكو.
جارىس قورىتىندىسى بويىنشا گران پري «ءۇشىنشى دەم» نومىرىنە بەرىلدى. ءوزبەكستاندىق دارشىلار كريستينا ءۆوروبوۆانىڭ جەتەكشىلىگىمەن جەڭىمپاز اتاندى. وتانداستارىمىز دا جۇلدەسىز قالمادى «جاۋىندا ۇشۋ» نومىرىمەن جۇپتاسقان اۋە بەلدىكتەرىندە ونەر كورسەتكەن مارينا ستارودۋبوۆا مەن دايانا جەتپىسوۆا كۇمىس ءجۇلدە يەگەرى اتاندى. بۇل جۇپتىڭ جەتەكشىسى جەتەكشىسى قازاقستان رەسپۋبليكاسىنىڭ ەڭبەك سىڭىرگەن قايراتكەرى قۇرمانعالي دوسباتىروۆ.
«ALMATY CIRCUS FESTIVAL» جەڭىمپازدارى مەن جۇلدەگەرلەرىنىڭ قاتىسۋىمەن وتەتىن فەستيۆال باعدارلاماسى 2024 جىلدىڭ 25 تامىزىنا دەيىن جالعاسادى.
بيلەتتەردى سيرك كاسساسىنان جانە Freedom Ticketon-نان ساتىپ الۋعا بولادى.
