مىندەتى الدانعان زەينەتكەرلەردەن اقشا جيناپ، سودان كەيىن مەكەنجايعا جونەلتۋ بولعان جالدامالى الاياقتى الماتىنىڭ كيبەرپوليسياسى ۇستادى.
بۇل – 19 جاستاعى ب.ەسىمدى ازامات، جەرگىلىكتى تۇرعىن. ۇستالعانعا دەيىن از ۋاقىت بۇرىن ەر ادام 79 جاستاعى اجەيدەن 1،2 ملن تەڭگەنى الىپ كەتكەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
ول بۇل قارجىنى قىزىنا جول-كولىك وقيعاسىنان كەيىن وتا جاساۋىنا قاجەت دەپ الداعان.
«ال جالدامالى الاياقتى ۇستاعان كەزدە ول تاعى ەكى الاياقتىق تىزبەگىن جۇزەگە اسىرىپ جاتتى: كۇدىكتى “جۇمىس بەرۋشى” كورسەتكەن مەكەنجايلارعا بارىپ، سول جەردەن زەينەتكەرلەردىڭ جيعاندارىن الىپ كەتۋ كەرەك بولدى. وسىلايشا، ءبىز كەم دەگەندە ەكى الاياقتىقتىڭ الدىن الدىق. جەدەل ءىس-شارانىڭ وسى كەزەڭىندە بولجامدى “تاپسىرىس بەرۋشى” انىقتالىپ، ونى ۇستاۋ شارالارى جۇرگىزىلۋدە. سونىمەن قاتار ب.ەسىمدى ازامات جاساعان باسقا دا ىقتيمال قىلمىستىق ەپيزودتار انىقتالىپ جاتىر. ول قاماۋعا الىندى»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.
پوليسيادا سونىمەن قاتار، الماتىدا IT-تەحنولوگيالار سالاسىنداعى قىلمىستاردى، سونىڭ ىشىندە ينتەرنەت-الاياقتىقتى اشۋعا جانە تەرگەۋگە ارنالعان “كيبەرپول” بولىمشەسىنىڭ جۇمىسىنىڭ پيلوتتىق نۇسقاسىنىڭ ىسكە قوسىلعانى تۋرالى حابارلادى. ارنايى قۇرىلعان قىزمەتكە تاجىريبەلى جەدەل ۋاكىلدەر، تەرگەۋشىلەر مەن كريميناليستتەر كىردى. سونىمەن قاتار الماتى قالالىق پد قارتتاردى الداۋ دەرەكتەرى جيىلەپ كەتكەنى تۋرالى ەسكە سالدى.
وسىعان بايلانىستى ءتارتىپ ساقشىلارى قاۋىپسىزدىك شارالارىن ەسكەرتەدى: 1. جاقىن تۋىستارىڭىز بەن دوستارىڭىزعا، اسىرەسە، قارت ادامدارعا وسىنداي الاياقتىق تۋرالى ەسكەرتىڭىز؛ 2. ەگەر سىزگە پوليسيا قىزمەتكەرى قوڭىراۋ شالسا، پوليسيا قىزمەتكەرلەرىنىڭ اقشا سۇراۋعا قۇقىعى جوق ەكەنىن ەستە ساقتاڭىز. اڭگىمەلەسۋدى باستاماس بۇرىن سۇحباتتاسۋشى ءوزىن تانىستىرۋى كەرەك (ءاتى-جونى، قىزمەتى، لاۋازىمى، جۇمىس ورنى). بۇل اقپاراتتى “102” ارناسىندا تەكسەرۋىڭىز كەرەك؛ 3. بەيتانىس ادام تەلەفون سوقسا، ونىڭ سىزگە نەنى جانە قالاي ايتقىسى كەلەتىنىنە نازار اۋدارىڭىز. الاياقتار، ادەتتە، اسىقتىرۋعا، شاتاستىرۋعا، ىقتيمال زارداپتارمەن قورقىتۋعا تىرىسادى.