الماتىدا اياز اتا شەرۋى ءوتتى. ەرتەگى الەمىنىڭ كەيىپكەرلەرى قالانىڭ ورتالىق كوشەلەرىمەن ءجۇرىپ ءوتىپ، مەگاپوليس تۇرعىندارى مەن قوناقتارىن كەلە جاتقان جاڭا 2024 جىلمەن قۇتتىقتادى.
باستى جاڭا جىلدىق شىرشا ورناتىلعان اباي الاڭىنان باستاپ، شەرۋ دوستىق داڭعىلىمەن قابانباي باتىر كوشەسىنە دەيىن، سودان كەيىن باتىس باعىتتا پانفيلوۆ كوشەسىنە دەيىن ءجۇرىپ، «استانا» الاڭىنا باردى. مارشرۋتتىڭ سوڭعى نۇكتەسى بەكەر تاڭدالماعان، ءدال وسى جەردە 31 جەلتوقساندا باستى جاڭا جىلدىق كونسەرت وتەدى، سودان كەيىن جاڭا جىلدىق وتشاشۋدى باستالادى.
«ءبىز بالالارعا جاقسى كوڭىل-كۇي مەن ۇمىتىلماس ەموسيا سىيلاي العانىمىزعا قۋانىشتىمىز. قالا تۇرعىندارى مەن قوناقتارى شەرۋگە قاتىسۋشىلارمەن سۋرەتكە ءتۇسىپ، سۇراقتارعا جاۋاپ بەرىپ، ولەڭدەر ايتىپ، سىيلىقتار، تاتتىلەر الدى. 60 ادامنان تۇراتىن اياز اتا شەرۋىن ءبىز ەكىنشى جىل قاتارىنان وتكىزىپ كەلەمىز جانە بۇل جاڭا جىل قارساڭىندا جاقسى داستۇرگە اينالىپ وتىر»، — دەدى الماتى قالاسىنىڭ مادەنيەت باسقارماسى.
ايتا كەتەيىك، 21 جەلتوقساننان باستاپ اباي اتىنداعى الاڭدا جانە استانا الاڭىندا كۇن سايىن بەلگىلى ارتىستەردىڭ، live-بەندتەر مەن ديدجەيلەردىڭ قاتىسۋىمەن كونسەرتتەر، ءتۇرلى بالالار بايقاۋلارى، انيماتورلارمەن ويىندار مەن ينتەراكتيۆتەر وتكىزىلەدى. 27-31 جەلتوقسان ارالىعىندا جاڭا جىلدىق قىسقى فەستيۆال اياسىندا قالانىڭ ءار اۋدانىندا كونسەرتتەر ۇيىمداستىرىلادى، وندا كەنجەبەك ءجانابىلوۆ، ءمولدىر اۋەلبەكوۆا، ءومىرقۇل اينيازوۆ، الىشەر قونىسبايەۆ، رايىم ۋايس، اباي بەگەي، اسحات تارعىن، Altair & Abbi، نۇرمۇحاممەد جاقىپ، مۇحتار حانزادا، نۇرسۇلتان نۇربەردييەۆ، اقبوتا-نۇر، جاندوس قارجاۋباي، جىگەر اۋىپبايەۆ، سەرىك يبراگيموۆ، التىنبەك تاشىمبەتوۆ جانە ت.ب. ارتيستەر ونەر كورسەتەدى.