مەگاپوليس اكىمى باقىتجان ساعىنتايەۆ ينجەنەرلىك ينفراقۇرىلىمدى دامىتۋدىڭ ونلاين-پرەزەنتاسياسى بارىسىندا قالا كوشەلەرىنە سىرتقى جارىق جەلىلەرىن تارتۋ تۋرالى ايتتى، دەپ حابارلايدى almaty-akshamy.kz
اكىم «الماتى» تا-نىڭ تىكەلەي ەفيرىندە سىرتقى جارىق جەلىلەرىنىڭ ۇزىندىعى 4815 شاقىرىمدى قۇرايتىنىن ايتتى. 165 مىڭنان استام شام بار. 2020 جىلى جۇرگىزىلگەن ينۆەنتاريزاسيا ناتيجەسىندە سىرتقى جارىعى جوق 2024 كوشە انىقتالدى. ولاردىڭ كوپشىلىگى تۇركسىب، الاتاۋ، ناۋرىزباي جانە مەدەۋ اۋداندارىندا كەزدەسەدى.
وتكەن جىلى 1423 كوشەگە جارىق جەلىلەرى تارتىلسا، بيىل 601 كوشە جارىقتاندىرىلادى. سونىمەن قاتار، قوسىمشا جارىقتاندىرۋ نۇكتەلەرى بيىل جارتىلاي جارىقتاندىرىلعان 171 كوشەگە، ال كەلەسى جىلى تاعى 895 كوشەگە ورناتىلادى. وسىلايشا، اعىمداعى جىلدىڭ سوڭىنا دەيىن 772 كوشەگە 18 743 شام ورناتىلادى ءارى جارىقتاندىرىلادى.
سونداي-اق، 2020 جىلى جالپى ۇزىندىعى 103 شاقىرىم بولاتىن دوستىق، گاگارين، شالياپين داڭعىلدارى، سايىن، مومىش ۇلى، جانسۇگىروۆ كوشەلەرى، سولتۇستىك اينالما تاس جولى بويىنداعى جارىق جەلىلەرى رەكونسترۋكسيالاندى. ەنەرگيا جيناقتايتىن 5376 شام جانە 3 165 باعانا ورناتىلدى. ناتيجەسىندە ەنەرگيا تۇتىنۋ ورتاشا 19،2%-عا قىسقاردى. ەسكىرگەن قۇرىلعىلار بار 48 كوشەدەگى 7 320 باعانا مەن 9 105 شامدى مودەرنيزاسيالاۋ جوسپارلانۋدا.
بۇدان وزگە، الاتاۋ، مەدەۋ، ناۋرىزباي جانە تۇركسىب اۋداندارىندا جاڭا جولداردىڭ قۇرىلىسى كەزىندە 146 كوشە جارىقتاندىرىلىپ، 2 مىڭعا جۋىق شامدار ورناتىلادى.
قالانىڭ سىرتقى جارىق جەلىلەرىندەگى اقاۋلاردى قالپىنا كەلتىرۋ ءۇشىن «ديسپەچەرلىك ورتالىق» تاۋلىك بويىنا جۇمىس جۇمىس ىستەيدى. وتىنىمدەر 300-75-41، 300-75-42 تەلەفوندارى، سونداي-اق «Open Almaty» جانە الەۋمەتتىك جەلىلەر ارقىلى قابىلدانادى. كۇن سايىن 100-دەن استام ءوتىنىش وڭدەلەدى.
سىرتقى جارىق جۇيەسىنىڭ تيىمدىلىگىن ارتتىرۋ ءۇشىن پاسپورتتاۋ ىسكە اسىرىلادى ءارى قاراي سيفرلىق كارتانى ازىرلەۋ جوسپارلانۋدا. باسقارۋدى اۆتوماتتاندىرۋ اقاۋلاردى دەر كەزىندە انىقتاۋعا جانە جويۋعا، جۇيەنى مودەرنيزاسيالاۋعا مۇمكىندىك بەرەدى. جالپى، كەلەر جىلى الماتى كوشەلەرىن تولىق جارىقتاندىرۋعا قولجەتكىزۋ مىندەتى قويىلدى. بۇل قالالىقتارعا جايلى ورتانى قامتاماسىز ەتۋمەن قاتار، قوعامدىق قاۋىپسىزدىك دەڭگەيىن ارتتىرادى.