جاستاردىڭ تاڭداۋى - جەمقورلىقسىز مەملەكەت.
وڭىرلىك كوممۋنيكاسيالار قىزمەتىنىڭ الاڭىندا ق ر سىبايلاس جەمقورلىققا قارسى ءىس-قيمىل اگەنتتىگىنىڭ قولداۋىمەن «ادىلدىك جولى» رەسپۋبليكالىق قوعامدىق بىرلەستىگىنىڭ اكسياسىنا ارنالعان بريفينگ ءوتتى، دەپ حابارلايدى Almaty-akshamy.kz.
الماتى قالالىق فيليالىنىڭ ديرەكتورى، الماتى قالاسى قوعامدىق كەڭەسىنىڭ سىبايلاس جەمقورلىققا قارسى ءىس-قيمىل كوميتەتىنىڭ مۇشەسى باۋىرجان ماقۇلبايەۆ جاريالانعان اكسيانىڭ جاستاردى سىبايلاس جەمقورلىققا قارسى ساياساتتى جۇزەگە اسىرۋ ءۇشىن تارتۋعا باعىتتالعانىن ايتتى. بۇل يدەيانى بەلگىلى كاسىبي بوكسشى، وليمپيادا ويىندارىنىڭ قول جۇلدەگەرى قانات يسلام قولدادى.
سپيكەر سىبايلاس جەمقورلىقپەن كۇرەستىڭ ماڭىزدىلىعى ونىڭ جان-جاقتى بولۋى قاجەتتىگىندە دەپ ەسەپتەيدى. تەك مەملەكەتتىڭ عانا ەمەس، بۇكىل ازاماتتىق قوعامنىڭ بىرىككەن كۇش-جىگەرى قاجەت.
سوندىقتان دا وسىعان دەيىن اكسيا اياسىندا «ادىلدىك جولى» مەن عىلىم جانە جوعارى ءبىلىم مينيسترلىگى اراسىندا ستۋدەنت جاستاردى ناۋقانعا تارتۋعا جانە ۋنيۆەرسيتەتتەر قىزمەتىندەگى سىبايلاس جەمقورلىق تاۋەكەلدەرىن ازايتۋعا مۇمكىندىك بەرەتىن ىنتىماقتاستىق تۋرالى مەموراندۋمعا قول قويىلعان بولاتىن.
باۋىرجان ماقۇلبايەۆتىڭ ايتۋىنشا، سىبايلاس جەمقورلىققا قارسى ارەكەت ەتۋگە قاتىستى سۇراقتار بويىنشا تەگىن كەڭەس الۋعا بولاتىن ارنايى 1463 كولل ورتالىق قوسىلعانىن ايتتى. سونىمەن قاتار، الەۋمەتتىك جەلىدە جاستاردان حابارلامالاردى قابىلداپ، وزەكتى جاڭالىقتاردى جەتكىزەتىن پاراقشالار اشىلدى.
اكسيامەن بىرگە سىبايلاس جەمقورلىققا قارسى يدەيالار مەن جوبالاردىڭ ۇزدىكتەرىن انىقتاۋعا ارنالعان بايقاۋدىڭ دا باستالاتىنى جاريالاندى، وندا ءاربىر ادام جەمقورلىققا قارسى ءوز كوزقاراسىن ۇسىنا الادى.
وتىنىمدەر info@adildik.kz ەلەكتروندى مەكەنجايى بويىنشا 2023 جىلدىڭ 15 قاڭتارىنا دەيىن قابىلدانادى. ودان كەيىن بايقاۋ كوميسسياسى ەلىمىزدىڭ ءار وڭىرىندەگى ۇزدىك جۇمىستاردى تاڭداپ، باعالى سىيلىقتارمەن ماراپاتتايدى. سونىمەن قاتار، كەيبىر يدەيالار ەكسپەريمەنتتىك پيلوتتىق جوبالار رەتىندە جۇزەگە اسىرىلادى.
«قازاقستاننىڭ جالپى جاستارىن اتالعان اكسياعا بەلسەندى قاتىسۋعا شاقىرامىز. ادىلەتتى قازاقستاندى قالىپتاستىرۋ ءاربىر ازاماتقا بايلانىستى جانە ءبىرىنشى كەزەكتە، جاستارعا بايلانىستى. الماتىداعى «ادىلدىك جولى» رقب فيليالىنىڭ بايلانىس تەلەفونى 8 701 222 65 55»، - دەپ حابارلادى ب.ماقۇلبايەۆ.
بريفينگ جۇمىسىنا سونىمەن بىرگە، كاسىبي بوكسشى قانات يسلام قاتىستى، ول سىبايلاس جەمقورلىققا قارسى مادەنيەت تۋرالى يدەيانى قولدادى.
«مەن وسى اكسياعا قاتىساتىنىم ءۇشىن وتە قۋانىشتىمىن. قازاقستان ازاماتى، ءبىر جاعىنان اتا-انا رەتىندە ءبىز ءارقاشان ادىلەتتىلىكتى تالاپ ەتەمىز. ءقازىر بالالارىمىز ءوسىپ كەلەدى، ءبارىمىز اتا-انا رەتىندە جاڭا قازاقستاندا، جەمقورلىقسىز مەملەكەتتە جاقسى ءومىر سۇرگىمىز كەلەدى»، - دەدى ق.يسلام.