شتابقا قازاقستانداعى جانە شەتەلدەگى تانىمال زاڭگەرلەر كىردى.
الماتى قالاسىنداعى قازاقستان رەسپۋبليكاسى پرەزيدەنتىنىڭ سايلاۋىنان حابار تاراتۋ جونىندەگى باسپا ءسوز ورتالىعىنىڭ الاڭىندا «قازاقستان زاڭگەرلەر وداعى» الماتى قالالىق فيليالىنىڭ ءتوراعاسى باۋىرجان ماقۇلبايەۆتىڭ قاتىسۋىمەن باسپا ءسوز ءماسليحاتى ءوتتى، دەپ حابارلايدى Almaty-akshamy.kz
ول سونىمەن قاتار «ءادىل سايلاۋ ءۇشىن» قالالىق شتابىن دا باسقارادى. سپيكەر 19 قاراشا ۇنسىزدىك كۇنى بولاتىنىن، ول كەزدە ۇگىت-ناسيحات جۇمىستارىنا قاتىستى كەز كەلگەن ارەكەتتەرگە تىيىم سالىناتىنىن ەسكە سالدى. زاڭدى بۇزعان جاعدايدا زاڭدى جاۋاپكەرشىلىك قاراستىرىلعان.
ەسكە سالايىق، قوزعالىستىڭ نەگىزگى مىندەتى – زاڭ قوعامداستىعىنىڭ سايلاۋ ناۋقانى بارىسىنا قۇقىقتىق باقىلاۋ جاساۋ جانە سايلاۋ پروسەسىنە قاتىسۋشىلارعا سايلاۋ زاڭناماسىن قولدانۋ ءتارتىبىن ءتۇسىندىرۋ. شتابقا قازاقستانداعى جانە شەتەلدەگى تانىمال زاڭگەرلەر كىردى.
«ءادىل سايلاۋ ءۇشىن» قوزعالىسى باستالعان 27 قىركۇيەكتەن باستاپ قازاقستاننىڭ بارلىق قالالارىندا پرەزيدەنت سايلاۋىن قۇقىقتىق قامتاماسىز ەتەتىن فيليالدار اشىلدى. قوزعالىس مۇشەلەرى بارلىق باق-ىن قامتىدى، الەۋمەتتىك جەلىلەردە بەلسەندىلىك تانىتىپ، قازاقستاندىقتاردىڭ سۇراقتارىنا جاۋاپ بەردى. ءتۇسىندىرۋ جۇمىستارىن جۇرگىزىپ، سايلاۋ زاڭناماسىن ءتۇسىندىرىپ، ەڭبەك ۇجىمدارىمەن كەزدەسۋلەر وتكىزىپ جاتىر»، - دەدى ب.ماقۇلبايەۆ.
زاڭگەرلەر سايلاۋعا العاش رەت قاتىسقالى وتىرعان ستۋدەنت جاستارعا ەرەكشە كوڭىل ءبولدى.
وكق سپيكەرى «قازاقستان رەسپۋبليكاسىنداعى سايلاۋ تۋرالى» زاڭعا سايكەس سايلاۋ كۇنى جانە ونىڭ الدىنداعى كۇنى كەز كەلگەن سايلاۋالدى ۇگىت-ناسيحات جۇرگىزۋگە تىيىم سالىناتىنىن ايتىپ، تولىقتىردى.
«مەن پرەزيدەنتتىككە ۇمىتكەرلەردى، ولاردىڭ سەنىمدى وكىلدەرىن، شتاب مۇشەلەرىن كەز كەلگەن ۇگىت-ناسيحات جۇمىستارىنان باس تارتۋعا شاقىرعىم كەلدى»، - دەپ ەسكە الدى «ءادىل سايلاۋ ءۇشىن» قالالىق شتابىنىڭ باسشىسى.