بىلتىر «اباي» باسپاسىنان شىققان 35 كىتاپتىڭ تۇساۋكەسەرى وتكەندە باسپا ۇجىمىنىڭ «الداعى 2024 جىلى قازاقتىڭ كوركەم ادەبيەت تۋىندىلارىن 100 تومدىققا جەتكىزەمىز» دەگەن ۋادەسى بار ەدى. بيىل باسپا سول ۋادە ۇدەسىنەن شىعىپ، 100 ەمەس، 155 كىتاپ باسىپ شىعاردى.
باسپادان قازاق ادەبيەتىنىڭ كلاسسيك اقىن-جازۋشىلارىنىڭ شىعارمالارىنان جاساقتالعان بىرەگەي تۋىندىلارمەن قاتار، بالالار مەن جاسوسپىرىمدەرگە ارنالعان شىعارمالار دا جارىق كورگەن. باسپا تەك قانا كوركەم ادەبيەت سالاسىندا عانا ەمەس، عىلىمعا دا كوڭىل بولە وتىرىپ، وڭايلىقپەن قولعا تۇسە بەرمەيتىن، ىزدەگەنگە تاپتىرماس اكادەميالىق زەرتتەۋ ەڭبەكتەرىمەن تولىعا تۇسكەن.
سونداي-اق كوركەم ادەبي كىتاپتاردان بولەك، بيىل باسپادان ءدىني-رۋحاني باعىتتاعى، تاريح سالاسىنداعى، ءسالت-داستۇر، اۋىز ادەبيەتىنىڭ جاۋھارلارى جارىق كورىپ وتىر. ولار: «ۇلى تاريح جانە ۇلى اۋليەلەر»، «ۇلى دالا تاريحى»، «تاراز — وركەنيەتتەر ورىمدەرىنىڭ كۋاگەرى»، «قاراحان بابا مەن ايشا ءبيبى»، «التىبارماق»، «تۇرمىس سالت جىرلارى»، «باتىرلىق جىر داستاندار»، «ليرو-ەپوستىق جىرلار»، «تۇرمىس سالت ەرتەگىلەرى»، «اڭىز-اڭگىمەلەر»، «قيال-عاجايىپ ەرتەگىلەر»، «اۋىز ادەبيەتىنىڭ شاعىن تۇرلەرى»، «حايۋاناتتار تۋرالى ەرتەگىلەر» جانە تاعى باسقالار.
— «اباي» باسپاسىنان جارىق كورگەن كوركەم ادەبيەت كىتاپتارىنىڭ كوشىن دۋلات باباتاي ۇلى، حاكىم اباي، شاكارىم، ءماشھۇر ءجۇسىپ كوپەي ۇلى باستاپ، مۇحتار اۋەزوۆ، الاشوردا قايراتكەرلەرىنىڭ شىعارمالارى مەن كەڭەس وداعى زامانىنىڭ ايگىلى قالامگەرلەرى جالعاستىرىپ وتىر. سونىمەن قاتار، باسپا وقىرماننىڭ سورەسىن تاۋەلسىز قازاقستاننىڭ كورنەكتى جازۋشىلارى مەن بەلگىلى جاس اۆتورلاردىڭ شىعارمالارىمەن تولىقتىردى. 155 كىتاپ تا الەمدىك سۇرانىسقا ساي، زاماناۋي ۇلگىدە، بوياۋى قانىق ديزايندا جارىق كوردى. ولار قالىڭ وقىرمان تالعامىنان شىعىپ، كىتاپسۇيەر قاۋىمدى قۋانتادى دەپ سەنەمىز، — دەدى بەلگىلى قالامگەر، “اباي” باسپاسىنىڭ ديرەكتورى اقبەرەن ەلگەزەك.