ەرجان باباقۇماروۆ اباي قۇنانبايەۆ ەسكەرتكىشىنە گۇل شوقتارىن قويۋ راسىمىنە قاتىستى
ۇلى اقىن، فيلوسوف، اعارتۋشى اباي قۇنانباي ۇلىنىڭ تۋعان كۇنى – اباي كۇنى اتالىپ ءوتتى. وسىعان وراي رەسپۋبليكا سارايى الدىنداعى اباي ەسكەرتكىشىنە گۇل شوعى قويىلدى.
اتالمىش شاراعا الماتى قالاسى اكىمىنىڭ ورىنباسارى ەرجان باباقۇماروۆ، قالالىق ارداگەرلەر كەڭەسىنىڭ ءتوراعاسى احان بيجانوۆ، قازاقستان جازۋشىلار وداعى باسقارماسىنىڭ ءتوراعاسى، اقىن ۇلىقبەك ەسداۋلەت، الماتى قالاسى مادەنيەت باسقارماسىنىڭ باسشىسى عاني مايلىبايەۆ قاتىسىپ، قۇتتىقتاۋ سوزدەرىن ايتتى.
بيىل قازاقستاندا اباي قۇنانبايەۆتىڭ تۋعانىنا 176 جىل جانە ق ر تاۋەلسىزدىگىنىڭ 30 جىلدىعى اتاپ وتىلەدى. قالا اكىمىنىڭ ورىنباسارى ەرجان باباقۇماروۆ ابايدىڭ باعا جەتپەس مۇراسى قازاقتىڭ ۇلتتىق مادەنيەتىنە زور ىقپال ەتكەنىن اتاپ ءوتتى. ونىڭ ەڭبەكتەرى بۇگىنگى كۇنگە دەيىن شاھارىمىزدىڭ، بۇكىل ەلدىڭ قوعامدىق جانە مادەني ءومىرىنىڭ باعىتتارىن ايقىنداپ وتىر.
وسىعان دەيىن ۇلى اقىننىڭ ناقتى قاي كۇنى دۇنيە ەسىگىن اشقانى جايلى ءبىراز كەرەعار پىكىرلەر ورىن العان. ونىڭ سەبەبى، اقىن ەسكى كۇنتىزبە بويىنشا 29 شىلدە كۇنى، جاڭا كۇنتىزبە بويىنشا 10 تامىز كۇنى تۋعان بولاتىن. ءبىر جىل بۇرىن عانا قازاقستان جازۋشىلار وداعى وسى داۋ-دامايدىڭ نۇكتەسىن قويىپ، ۇكىمەتكە ۇسىنىس بىلدىرگەن. ناتيجەسىندە 10 تامىز - اباي كۇنى اتالىپ، بۇكىلحالىقتىق مەرەكەگە اينالىپ وتىر.
«رەسمي مويىندالعان مەرەكە بولعاندىقتان، ءقازىر قاي قالا، وبلىس ورتالىعى بولماسىن، بار جەردە اباي ەسكەرتكىشى الدىنا گۇل شوعى قويىلىپ، مەرەكە اتالىپ ءوتىپ جاتىر. بارلىق عىلىم مەن ءبىلىم، مادەنيەت وشاقتارىندا ابايعا قاتىستى ءىس-شارالار جۇرگىزىلۋدە. اباي – تۇڭعيىق تەرەڭ قۇبىلىس. ونى ءبىز تولىققاندى زەرتتەدىك دەپ ايتا المايمىز، ءبىراق بىلتىردان بەرى وسى باعىتتا ءبىراز اۋقىمدى جۇمىستار قولعا الىندى»، - دەدى ۇلىقبەك ەسداۋلەت.
اقىننىڭ ايتۋىنشا، پاندەميا باستالعالى بەرى بارلىق بۇقارالىق شارالارعا تىيىم سالىنعاندىقتان، اباي اتامىزدىڭ تۋعان كۇنىن ادەتتەگىدەي جۇرتتى جيناپ، ولەڭ وقىتىپ، دۇركىرەتىپ وتكىزۋگە مۇمكىندىك بولمادى. دەگەنمەن، الماتى قالالىق مادەنيەت باسقارماسىنىڭ قولداۋىمەن بۇگىندە 50-دەن استام ونلاين مادەني شارالار ۇيىمداستىرىلىپ، 2 بايقاۋ وتكىزىلۋدە.
ارداگەرلەر كەڭەسىنىڭ ءتوراعاسى احان بيجانوۆ وسىنداي قيىن-قىستاۋ كەزەڭدە دە ۇلى تۇلعالارىمىزدى ۇمىت قالدىرماي، ەڭ بولماعاندا رۋحىنا تاعزىم ەتۋ يگى ءىس ەكەنىن العا تارتتى.
«اباي شىعارماشىلىعىن بالا كەزدەن وقىپ، ءالى كۇنگە دەيىن زەردەلەپ كەلەمىز. ول – جىلدار توعىسىندا ماڭىزدىلىعىن جوعالتپايتىن اسىل مۇرا قالدىرعان ۇلى تۇلعا. قانداي زامان بولماسىن، حالىق كوشباسشىلارىن ۇمىتپاي، ولاردىڭ سىڭىرگەن ەڭبەكتەرىن ەلەپ، ەسكە الۋ – ۇلت مىندەتى. بۇگىن دە سول ءۇشىن جينالىپ وتىرعان جايىمىز بار»، - دەدى احان بيجانوۆ.
شارادا قالىڭ قالامگەرلەر قاۋىمى باس قوسپاسا دا، جينالعان جاندار بارشا قازاق جۇرتىن وسىناۋ مەرەكەمەن قۇتتىقتاپ، جىلى لەبىزدەرىن ءبىلدىردى. قازاقستان جازۋشىلار وداعى ءتوراعاسىنىڭ ورىنباسارى، بەلگىلى اقىن باقىت بەدەلحاننىڭ ايتۋىنشا، اباي كۇنى قازاق حالقى ءۇشىن ماڭىزدى ءارى رۋحاني مەرەكە.
«بۇگىن – اباي كۇنى. «اباي كۇنى» دەپ التى الاشقا جار سالىپ تويلاۋدىڭ بۇكىل ەل ءۇشىن رۋحاني باقىت ەكەنىن سەزىنەمىز. بيىل ايتۋلى مەرەكەنى ەكىنشى رەت تويلاپ وتىرمىز. اباي كۇنى بارشا قازاقتارعا قۇتتى، بەرەكەلى، جاقسى كۇندەردىڭ ءبىرى بولسىن دەپ تىلەيمىن. مىنە، بۇگىن دە اباي اتامىزدىڭ ەسكەرتكىشىنە كەلىپ، ەسكە الىپ، گۇل شوعىن قويۋ ارقىلى رۋحىنا تاعزىم جاسادىق»، - دەدى باقىت بەدەلحان ۇلى.