الماتىدا جىل سوڭىنا دەيىن 3 دەنە شىنىقتىرۋ-ساۋىقتىرۋ كەشەنى اشىلادى
الماتىدا تۇرعىنداردى سپورتتىق ءىس-شارالارعا قاتىستىرۋ 42%-عا دەيىن ءوستى، دەپ حابارلايدى almaty-akshamy.kz
الماتىدا سپورت ينفراقۇرىلىمىن قۇرۋ جۇمىستارى جالعاسىپ وتىر. بيىل مەگاپوليستىڭ تۇركسىب، مەدەۋ، الاتاۋ اۋداندارىندا 3 دەنە شىنىقتىرۋ-ساۋىقتىرۋ كەشەنىن اشۋ جوسپارلانعان. جاڭا نىساندار كۇن سايىن بارلىعى 2000-نان استام ادامدى قابىلداي الادى.
سونىمەن قاتار، 4 دەنە شىنىقتىرۋ-ساۋىقتىرۋ كەشەنى، مۇمكىندىگى شەكتەۋلى جاندارعا ارنالعان سپورت ورتالىعى، جەڭىل اتلەتيكا مانەجى، «مەدەۋ» بتسك جاڭعىرتۋ جانە ورتالىق ستاديوننىڭ جوبالاۋ-سمەتالىق قۇجاتتاماسىن ازىرلەۋ جۇرگىزىلۋدە.
سپورت باسقارماسىنىڭ مالىمەتىنشە، 2023 جىلى سپورتپەن تۇرعىنداردى قامتۋ 42% بولدى، بۇل 924 000 تۇرعىن. ءبىر جىل بۇرىن بۇل كورسەتكىش 37% ەدى وتكەن جىلى بارلىعى 3 مىڭعا جۋىق سپورتتىق-بۇقارالىق ءىس-شارا وتكىزىلدى.
بۇعان قوسا، سالاۋاتتى ءومىر سالتىن ۇستانۋعا جانە بۇقارالىق سپورتتى قولداۋعا قولايلى جاعداي جاساۋ بويىنشا جۇيەلى جۇمىس جۇرگىزىلىپ وتىر.
2023 جىلى سپورتتىڭ 64 ءتۇرى بويىنشا 31 مىڭنان استام بالا تەگىن سپورت سەكسياسىمەن قامتىلدى. ايتا كەتەيىك، 4-17 جاس ارالىعىنداعى قالا تۇرعىندارى سپورت سەكسيالارىنا تەگىن قاتىسا الادى.
سونىمەن بىرگە، جالپى سانى 32 مىڭنان استام ادامدى قامتيتىن كوماندالىق سپورت تۇرلەرى بويىنشا (شاعىن فۋتبول، باسكەتبول، ۆولەيبول) مەكتەپ جانە ستۋدەنتتەر ليگاسى قۇرىلدى.
سالا ماماندارىن كاسىپتىك دايارلاۋ بويىنشا دا جۇمىس جالعاسىپ كەلەدى. 2023 جىلدىڭ باسىنان باستاپ 44 حالىقارالىق دارەجەدەگى سپورت شەبەرى، 166 سپورت شەبەرى، 1895 سپورت شەبەرىنە ۇمىتكەر جانە 848 ءبىرىنشى دارەجەلى سپورتشى دايىندالدى. 12 سپورت تۇرىنەن 23 ادام (تاەكۆوندو، ايەلدەر بوكسى، جەڭىل اتلەتيكا، وق اتۋ، دزيۋدو، گرەك-ريم كۇرەسى، ەركىن كۇرەس، بايداركا مەن كانوەدە ەسۋ، سپورتتىق گيمناستيكا، سەمسەرلەسۋ، ستەندتىك اتۋ) وليمپيادالىق ليسەنزيالاردى جەڭىپ الۋعا ۇمىتكەر اتاندى.
الماتىدا بارلىعى 3703 سپورت نىسانى جۇمىس ىستەيدى.