جاڭا بايلانىس
الماتى اكىمى باقىتجان ساعىنتايەۆ قالادا قاۋىپسىزدىك پەن بايلانىس ينفراقۇرىلىمىن كۇشەيتۋ جۇمىستارى تۋرالى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سوڭعى وقيعالار قالاداعى بەينەباقىلاۋ ايماعىن ۇلعايتۋ بويىنشا جۇمىسىمىزدىڭ دۇرىستىعىن كورسەتتى. 2021 جىلى 1 مىڭنان استام كامەرا، جول قاۋىپسىزدىگى ءۇشىن 2258 «سەرگەك» كامەراسى ىسكە قوسىلدى. مەكتەپتەردەن 2620 كامەرا جانە 4 مىڭنان استام اۋلا كامەراسى پوليسيانىڭ جەدەل باسقارۋ ورتالىعىنا (جبو) قوسىلدى»، - دەدى باقىتجان ساعىنتايەۆ.
ەكى جىل ىشىندە پوليسيا دەپارتامەنتىنىڭ جبو-عا قوسىلعان كامەرالار سانى 4 ەسە وسكەن. بيىل الاتاۋ، ناۋرىزباي، تۇركسىب، جەتىسۋ جانە مەدەۋ اۋداندارىنداعى كوپشىلىك جينالاتىن جەرلەردە 3،5 مىڭ كامەرا قوسىلدى، ال شالعاي اۋدانداردا 200-گە جۋىق «سەرگەك» كەشەنى ورناتىلدى.
باقىتجان ساعىنتايەۆتىڭ تاپسىرماسى بويىنشا ءورت قاۋىپسىزدىگىن ارتتىرۋ ءۇشىن از جابدىقتالعان اۋدانداردا جاڭا دەپولاردى جوبالاۋ مەن سالۋ جۇمىستارى باستالماق. قازىرگى ۋاقىتتا ايۋساي جانە اقساي وزەندەرىنىڭ شاتقالدارىندا سەل ۇستايتىن ەكى بوگەت سالىنۋدا. جەر سىلكىنىسى ءقاۋپىن الدىن الا ەسكەرتۋ ءۇشىن 11 سەيسميكالىق ستانسيا مەن 2 تالداۋ پۋنكتى ورناتىلادى.
«تۇرعىندار توتەنشە جاعدايدا ءوزىن قالاي ۇستاۋ كەرەكتىگىن ءبىلۋى كەرەك. سوندىقتان جاقىن ارادا ءبىرىڭعاي كەزەكشى ديسپەچەرلىك قىزمەتى اشىلادى. ول - «911»ء-دىڭ انالوگى. ءقازىر جابدىقتاردى جوندەۋ جانە قىزمەتكەرلەردى وقىتۋ ءجۇرىپ جاتىر»، - دەپ اتاپ ءوتتى اكىم.
سونداي-اق، قالادا ينتەرنەت پەن ءموبيلدى بايلانىس ماسەلەسىن شەشۋ ءۇشىن ينۆەستورلار تارتىلعان. وسىنىڭ ارقاسىندا 500 كم ماگيسترالدىق تالشىقتى-وپتيكالىق بايلانىس جەلىلەرى سالىندى، 1،8 مىڭ كم كليەنتتىك كابەل توسەلدى.
"نۇرشاشقان"، "المەرەك"، "قايرات"، "دوستىق"، "التىن بەسىك"، "تاستىبۇلاق"، "تاۋ سامالى"، "اقجار"، "قالقامان-2"، "شۇعىلا"، "العاباس"، "تەرەكتى" ىقشاماۋداندارىنا ينتەرنەتكە قوسىلۋ مۇمكىندىگى تۋدى.
بيىل تالشىقتى-وپتيكالىق بايلانىس جەلىلەرىنىڭ قۇرىلىسى جالعاسادى، وعان 20 مىڭنان استام ابونەنت قوسىلاتىن بولادى.