قالا اكتيۆى، بەلسەندىلەرى مەن سوعىس ارداگەرلەرىنىڭ گۇل قويۋ ءراسىمى اسكەري قىزمەتكەرلەردىڭ سالتاناتتى مارشىمەن باستالىپ، الماتى قالاسى اكىمىنىڭ ەسترادالىق جانە سيمفونيالىق وركەسترىنىڭ مەرەكەلىك كونسەرتى قازاقستان ەسترادا جۇلدىزدارىنىڭ اتسالىسۋىمەن ۇيىمداستىرىلادى. بۇل تۋرالى بۇگىن وڭىرلىك كوممۋنيكاسيالار قىزمەتىندە وتكەن بريفينگتە باياندالدى، دەپ حابارلايدى اlmaty-akshamy.kz.
الماتى قالالىق ارداگەرلەر كەڭەسى ءتوراعاسىنىڭ ورىنباسارى سەرىك قۇرمانعالييەۆ مەگاپوليستەگى مامىر مەرەكەلەرىنە دايىندىق قالاي ءجۇرىپ جاتقانى جونىندە بايانداپ بەردى.
«جىلداعى ءداستۇر بويىنشا، الماتىدا جەڭىس كۇنىن مەرەكەلەۋ تۇجىرىمداماسىن ازىرلەۋگە ارداگەرلەر بەلسەندى تۇردە قاتىسىپ، قالا اكىمدىگىمەن بىرلەسە وتىرىپ، 41 تارماقتان تۇراتىن قالانىڭ ءىس-شارالار جوسپارىن جاساعان. ءبىرىنشى كەزەكتە سوعىس ارداگەرلەرى مەن تىل ەڭبەككەرلەرىنە قۇرمەت كورسەتۋ - باستى نازاردا. مەرەكە كۇنى جەرگىلىكتى بيلىك ءىس-شارالار وتەتىن ورىنداردى مەرەكەلىك بەزەندىرىپ، قالا بويىنشا بيلبوردتار، مەدياتاقتالار مەن LED ەكراندار ورناتادى. بيىل 50 مىڭ دانا «جەڭىس» تۋرالى تاسپا شىعارىلادى. ولاردى بەلسەندى تۇردە تاراتۋ ءۇشىن ۆولونتەرلار جاپپاي تارتىلادى»، - دەدى ول.
اۋدان اكىمدەرىمەن بىرگە قالادا ورنالاسقان مەموريالدىق تاقتالارعا، ەسكەرتكىشتەرگە، سوعىستا قازا تاپقان، ەرلىك كورسەتكەن باتىرلاردىڭ ماڭگىلىك ەسكەرتكىشتەرىنە (ب.مومىش ۇلى ەسكەرتكىشى، ت.بيگەلدينوۆ، س.نۇرماعامبەتوۆ، ر.قوشقاربايەۆ، ءا.مولداعۇلوۆا مەن م.مامەتوۆا، س.لۋگانسكييدىڭ ءبيۋستى، «وتان قورعاۋشى باتىر ۇلدارىنا ماڭگىلىك ەسكەرتكىش»، «وتان ءۇشىن شايقاستا قازا تاپقان باتىرلارعا ماڭگىلىك تاعزىم» اتتى داڭق ەسكەرتكىشتەرىنە) تاعزىم ەتىلەدى.
تاقىرىپتىق ديزايندارمەن بەزەندىرىلگەن (برەندماۋەر، اسكەر ءۇيىنىڭ قاسبەتى) كىشى ارحيتەكتۋرالىق پىشىندەر، كونسەرت ساحناسى، ارداگەرلەرگە ارنالعان ارنايى شاتىرلار، دالالىق اسحانا، ۇوس باتىرلارىنىڭ ءتىرى «مۇسىندەرى-قويىلىمىنىڭ» كورسەتىلىمى جانە ت.ب. ورنالاستىرىلدى.
سونىمەن قاتار، زاماناۋي قازاقستاندىق اسكەري تەحنيكا مەن قارۋ-جاراق كورمەسى كورسەتىلەدى.
تۇرعىندارعا بەيبىت ومىردەگى مەرەكەلىك كوڭىل-كۇي سىيلاۋ ءۇشىن 9 مامىردا ءبىر مەزگىلدە بىرنەشە جەردە مادەني ءىس-شارالار كەڭىنەن ۇيىمداستىرىلادى.
ساعات 10:00-دەن 14:30-عا دەيىن ۆوزنەسەنسكيي سوبورىنىڭ الدىنداعى الاڭدا (28 گۆارديالىق پانفيلوۆشىلار ساياباعى) كونسەرتتىك باعدارلاما وتەدى.
11:00-دەن 16:30-عا دەيىن ارباتتا (جىبەك جولى مەن پانفيلوۆ كوشەلەرىنىڭ قيىلىسى) جانە ش.ءۋاليحانوۆ اتىنداعى ساياباقتا دا وسىنداي كونسەرتتەر قالا تۇرعىندارى مەن قوناقتارى ءۇشىن ۇيىمداستىرىلادى.
ءدال وسى كۇنى باسقا اۋدانداردا دا (الاتاۋ اۋدانىندا 7 مامىردا وتەدى) قاتار ءتۇرلى مەرەكەلىك شارالار وتكىزىلەدى دەپ كۇتىلۋدە.