الماتىدا مەديسينالىق ينفراقۇرىلىمدى جاڭارتۋ جانە مەديسينالىق كومەكتىڭ ساپاسىن جۇيەلى تۇردە ارتتىرۋ باعدارلاماسى اياسىندا №8 قالالىق كلينيكالىق اۋرۋحانانى اۋقىمدى قايتا جاڭعىرتۋ جوسپارلانىپ وتىر.
الماتى قالاسى اكىمدىگىندە ايتىلعاندا، جاڭارتىلعان نىسان تۇركسىب اۋدانى تۇرعىندارى ءۇشىن شۇعىل جانە جوسپارلى مەديسينالىق كومەكتىڭ تىرەك ورتالىعىنا اينالادى.
جوبانىڭ ءبىرىنشى كەزەڭىندە 1972 جىلى سالىنعان، قازىرگى ۋاقىتتا پايدالانىلماي تۇرعان عيماراتتاردى ەرەسەك تۇرعىندارعا ارنالعان، 150 ورىندىق كوپسالالى ستاسيونارعا قايتا جاڭعىرتۋ كوزدەلگەن. سونىمەن قاتار وسى كەزەڭدە قابىلداۋ ءبولىمىنىڭ جاڭا عيماراتىنا قوسىمشا قۇرىلىس سالۋ جوسپارلانىپ وتىر. پاسيەنتتەر دياگنوستيكا مەن ەمدەۋدەن «ءبىر تەرەزە» قاعيداتى بويىنشا (Check-up) وتە الادى.
جوبانىڭ ەكىنشى كەزەڭىندە قولدانىستاعى كورپۋستى 150 ورىندىق بالالار اۋرۋحاناسىنا قايتا جاڭعىرتۋ قاراستىرىلعان. اتالعان عيماراتتىڭ جەكە قابىلداۋ ءبولىمى بولادى. جاڭا كورپۋستار پايدالانۋعا بەرىلگەننەن كەيىن قالا تۇرعىندارى كەڭ اۋقىمدى مەديسينالىق كومەكتى ءوز اۋدانىندا الا الادى. ونىڭ ىشىندە جوعارى تەحنولوگيالىق باعىتتار (حيرۋرگيا، ۋرولوگيا، گينەكولوگيا، نيەۆرولوگيا جانە باسقا دا سالالار)، ەرەسەكتەر مەن بالالارعا تاۋلىك بويى كورسەتىلەتىن شۇعىل مەديسينالىق كومەك، ساۋلەلىك جانە فۋنكسيونالدىق دياگنوستيكا مۇمكىندىكتەرىن كەڭەيتۋ، سونداي-اق فيزيوتەراپيا بلوگى نەگىزىندە وڭالتۋ جانە قالپىنا كەلتىرۋ ەمى قاراستىرىلعان.
قازىرگى ۋاقىتتا جوبالىق-سمەتالىق قۇجاتتاما ازىرلەنىپ جاتىر. بيىل ماۋسىم ايىندا جوبانىڭ مەملەكەتتىك ساراپتاماسىنىڭ قورىتىندىسى الىنادى، سودان كەيىن قۇرىلىس-مونتاج جۇمىستارى باستالادى.
ايتا كەتۋ كەرەك، بۇعان دەيىن مەكەمە «الماتى تەمىرجول اۋرۋحاناسى» اتاۋىمەن جۇمىس ىستەپ، «قازاقستاندىق مەديكو-كوسمەتولوگيالىق ينستيتۋتى «پاراسات» ءجشس-نىڭ سەنىمدى باسقارۋىندا بولعان. 2021 جىلى اۋرۋحانا الماتى قالاسى قوعامدىق دەنساۋلىق ساقتاۋ باسقارماسىنىڭ كوممۋنالدىق مەنشىگىنە بەرىلدى.