ولار قالاداعى 35 ۋنيۆەرسيتەتتە ءبىلىم الىپ جاتىر.
الماتىدا 7 مىڭنان اسا ستۋدەنت جاتاقحانالار مەن حوستەلدەرگە ورنالاستىرىلدى، دەپ حابارلايدى Almaty-akshamy.kz عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
سوڭعى ءۇش اپتادا الماتىداعى 35 جوعارى وقۋ ورنىنىڭ 7 مىڭنان اسا ستۋدەنتى قوسىمشا جاتاقحانالار مەن حوستەلدەرگە ورنالاستى. كەيبىر ۋنيۆەرسيتەتتەر ءوز ستۋدەنتتەرى ءۇشىن جەكەمەنشىك جاتاقحانالار مەن حوستەلدەردى جالعا الدى، ال كەيبىر ينستيتۋتتار ءوز بالانسىنداعى عيماراتتاردى ستۋدەنتتەر باسپاناسىنا اينالدىردى، - دەپ جازىلعان حابارلامادا.
مىسالى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى ستۋدەنتتەردى قازاق مەديسينالىق ۇزدىكسىز ءبىلىم بەرۋ ۋنيۆەرسيتەتىنىڭ، ەۋرازيالىق تەحنولوگيا ۋنيۆەرسيتەتىنىڭ جاتاقحانالارىنا قوسىمشا ورنالاستىرعان. سونداي-اق ۋنيۆەرسيتەت ءوز ستۋدەنتتەرى ءۇشىن جەكەمەنشىك جاتاقحانالار مەن حوستەلدەردەن جاتىن ورىندى جالعا العان.
«Satbayev University، حالىقارالىق ءبىلىم بەرۋ كورپوراسياسى، «تۇران» ۋنيۆەرسيتەتى جانە باسقا دا جوعارى وقۋ ورىندارى جوعارى كۋرس ستۋدەنتتەرى ءۇشىن قوسىمشا باسپانالاردى، ونىڭ ىشىندە جەرگىلىكتى كاسىپكەرلەردەن جاتاقحانالار مەن حوستەلدەردى جالعا الدى»، - دەپ جازىلعان حاباردامادا.
قالاداعى 1-كۋرس ستۋدەنتتەرى جاڭا وقۋ جىلىنىڭ باسىندا تولىق جاتاقحانامەن قامتاماسىز ەتىلگەن. ستۋدەنتتەردى باسپانامەن قامتۋ ماسەلەسى عىلىم جانە جوعارى ءبىلىم مينيسترلىگىنىڭ باقىلاۋىندا.
ايتا كەتەيىك، بۇگىندە الماتىدا 104 ازاماتتىق جوعارعى وقۋ ورنىندا 309 جاتاقحانا بار. وندا 101 مىڭنان استام ستۋدەنت تۇرادى. 2022 جىلدىڭ سوڭىنا دەيىن قازاقستاندا 5 مىڭ ورىندىق تاعى 17 جاتاقحانانى پايدالانۋعا بەرىلەدى دەپ جوسپارلانىپ وتىر.