سانيتاريالىق اۆتوكولىكتى ودان ءارى جاڭارتۋ ماقساتىندا بيىل تاعى 48 جەدەل مەديسينالىق جاردەم اۆتوكولىگىن ساتىپ الۋ جوسپارلانۋدا.
حالىققا شۇعىل جانە جەدەل كومەك كورسەتۋگە ارنالعان سانيتاريالىق اۆتوكولىك جەرگىلىكتى بيۋدجەت قاراجاتىنان ساتىپ الىندى، ۆ كلاسىنا سايكەس كەلەدى جانە الەمدىك برەندتەردىڭ زاماناۋي مەديسينالىق جابدىقتارىمەن: رەانيماسيالىق جابدىقتارمەن، دەفيبريللياتورلارمەن، ەلەكتروكارديوگرافتارمەن، ءوجج اپپاراتتارىمەن جانە باسقا دا قاجەتتى جابدىقتارمەن جاراقتاندىرىلدى، دەپ حابارلايدى Almaty-akshamy.kz ق ر دەنساۋلىق ساقتاۋ مينيسترلىگىنە سىلتەمە جاساپ.
الماتى قالاسى بويىنشا شۇعىل مەديسينالىق كومەكتى، ولار پاسيەنتكە ۋاقتىلى جەتۋدى ەسكەرە وتىرىپ، اۋماقتىق ورنالاسقان جەدەل مەديسينالىق جاردەم قىزمەتىنىڭ 12 قوسالقى ستانسياسى كورسەتەدى.
قالا اكىمدىگىندە ساتىپ الىنعان جاڭا ماشينالار مەديسينالىق كومەك كورسەتۋ ساپاسىن جانە ونىڭ جەدەلدىگىن جاقسارتۋعا مۇمكىندىك بەرەتىنىنە سەنىمدى.
الماتىدا تاۋلىك سايىن جەلىدە 186 جمك بريگاداسى جۇمىس ىستەيدى جانە 3000-عا جۋىق قوڭىراۋعا قىزمەت كورسەتەدى. 2023 جىلدىڭ قورىتىندىسى بويىنشا جەدەل جاردەم بريگادالارى 1 ملن-نان استام شاقىرۋدى ورىندادى. قوڭىراۋلاردىڭ 93%-ى 1-3ء-شى سانات بويىنشا ۋاقتىلى جەتۋمەن قامتاماسىز ەتىلەدى.
ماسەلەن، 2023 جىلى اكىمدىك جەرگىلىكتى بيۋدجەتتەن قاراجات ءبولدى، بۇل سيفرلاندىرۋ بويىنشا جابدىقتار مەن باعدارلامالىق قامتاماسىز ەتۋدى، سيمۋلياسيالىق ورتالىقتىڭ جابدىقتارى مەن مۋلياجدارىن ساتىپ الۋعا، قىزمەتكەرلەردى نىساندى كيىمدەرمەن قامتاماسىز ەتۋگە، مەديسينالىق جابدىقتاردى (قاشىقتىقتان ەكگ، وتتەگى ينگالياتورلارى) ساتىپ الۋعا، قارجى ليزينگى باعدارلاماسى بويىنشا ساتىپ الىنعان سانيتاريالىق اۆتوكولىككە ۋاقتىلى تەحنيكالىق قىزمەت كورسەتۋگە مۇمكىندىك بەردى.
2024 جىلعا 4 قوسالقى ستانسيا سالۋعا جانە 3 قوسالقى ستانسيانى كۇردەلى جوندەۋگە جسق ازىرلەۋ جوسپارلانۋدا.
جالپى، جەدەل جاردەم قىزمەتىن دامىتۋدىڭ 2028 جىلعا دەيىنگى تۇجىرىمداماسىنا سايكەس حالىقتىڭ تىعىزدىعى مەن قالانىڭ دامۋىن ەسكەرە وتىرىپ، 12 جاڭا قوسالقى ستانسيا سالۋ جوسپارلانۋدا.