الماتىدا 2025 جىلى 1200-گە جۋىق قاراڭعى ۋچاسكە جارىقتاندىرىلادى. بۇل وتكەن جىلمەن سالىستىرعاندا 10 ەسە كوپ. بۇل تۋرالى «الماتى قالا جارىق» مەملەكەتتىك كوممۋنالدىق كاسىپورنىنىڭ ديرەكتورى يگور مىسيك مالىمدەدى، دەپ حابارلايدى aqshamnews.kz
«الماتى اكىمى ەربولات دوسايەۆتىڭ تاپسىرماسىمەن ءۇش كەزەڭنەن تۇراتىن جوسپار ازىرلەندى. ءبىرىنشى كەزەڭ – بۇرىننان بار جارىق جەلىلەرىن قالپىنا كەلتىرۋ بولاتىن. ءقازىر بۇل جۇمىستار تولىعىمەن اياقتالۋعا جاقىن: بارلىق قولدانىستاعى جەلى ىسكە قوسىلىپ، تەحنيكالىق قىزمەت كورسەتىلىپ وتىر. 2024 جىلدىڭ قاڭتارىنان باستاپ «الماتى قالا جارىق» مىندەتىن تولىق كولەمدە اتقارا باستاعالى بەرى قالادا 45 مىڭ شام اۋىستىرىلدى، 3 مىڭنان استام جاڭا باعان ورناتىلدى، شامامەن 500 شاقىرىم كابەل جەلىسى تارتىلدى.
ەكىنشى كەزەڭ اياسىندا 2024 جىلى جارىقسىز قالعان 120 ۋچاسكە جارىقتاندىرىلدى. ال 2025 جىلى 1200-گە جۋىق قاراڭعى كوشە جارىقپەن قامتاماسىز ەتىلەدى – بۇل وتكەن جىلمەن سالىستىرعاندا 10 ەسە كوپ»، – دەدى يگور مىسيك.
ءۇشىنشى كەزەڭدە جارىق جۇيەسىن اۆتوماتتاندىرۋ كوزدەلگەن. 2025 جىلدىڭ وزىندە سىرتقى جارىقتاندىرۋدى باسقارۋعا ارنالعان 320 سىرتقى جارىقتاندىرۋدى باسقارۋ شكافى اۋىستىرىلدى. جىل سوڭىنا دەيىن ولاردىڭ جالپى سانىنىڭ 70%-ى، ياعني 1100 شكافتىڭ 800ء-ى جاڭارتىلادى.
ەسكە سالا كەتەيىك، 2024 جىلدىڭ قاڭتارىنان باستاپ قالاداعى جارىقتاندىرۋ جەلىلەرىنىڭ باسىم بولىگىن «الماتى قالا جارىق» باسقارۋدا. بۇعان دەيىن بۇل جەلىلەر مەملەكەتتىك-جەكەمەنشىك ارىپتەستىك اياسىندا ءۇش كومپانيادان تۇراتىن كونسورسيۋمنىڭ قاراۋىندا بولعان، الايدا مىندەتىن تيىسىنشە اتقارا الماعاندىقتان، 2023 جىلدىڭ جازىندا قالا اكىمى ەربولات دوسايەۆ كەلىسىمدى بۇزىپ، بارلىق ينفراقۇرىلىمدى اۋدان اكىمدىكتەرىنىڭ بالانسىنا بەرۋدى تاپسىرعان ەدى. قازىرگى تاڭدا بۇل جەلىلەردىڭ بارلىعى «الماتى قالا جارىق» مەكەمەسىمەن كەلىسىمشارت نەگىزىندە قىزمەت كورسەتىلۋدە.