الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ءۇشىنشى رەت جۇرەكتى ترانسپلانتاسيالاۋ وپەراسياسى جاسالدى.
5 ساعاتقا سوزىلعان كۇردەلى وپەراسيانى كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتايەۆ UMC «جۇرەك ورتالىعى» №2 كارديوحيرۋرگيا بولىمشەسىنىڭ مەڭگەرۋشىسى سۆەتلانا نوۆيكوۆامەن، سونداي-اق انەستەزيولوگتار مەن كارديوحيرۋرگتارمەن بىرلەسىپ جۇرگىزدى.
الماتى قالاسىنىڭ ورتالىق قالالىق اۋرۋحاناسىنا تۇسكەن 40 جاستاعى ەر ادام دونور بولدى، دارىگەرلەر پاسيەنتتىڭ مي ءولىمىن راستادى.
جۇرەك الماتى وبلىسى تالعار قالاسىنىڭ تۇرعىنى 43 جاستاعى ەر ادامعا ترانسپلانتاسيالاندى. ول يشەميالىق كارديوميوپاتياعا، جۇرە پايدا بولعان جۇرەك اقاۋىنا، ميترالدى قاقپاقشا قىزمەتىنىڭ جەتكىلىكسىزدىگىنە، 26% شىعارىلۋ فراكسياسى تومەندەگەن سوزىلمالى جۇرەك قىزمەتىنىڭ جەتكىلىكسىزدىگىنە، 2022 جىلى ينفاركتقا شالدىققان. ناۋقاستا ازداعان دەنە قيمىلى كەزىندە ەنتىگۋ، جۇرەكتىڭ دۇرىس جۇمىس ىستەمەۋى، جالپى السىزدىك، باس اينالۋ شاعىمدارى بولدى.
ەمدەۋگە قاراماستان، جاعدايى جاقسارمادى، جۇرەكتىڭ كوپ بولىگى تىرتىقتان تۇرىپ، جيىرىلمادى.
ترانسپلانتاسيادان بۇرىن وعان بىرنەشە رەت ستەنت قويىلعان، كارديوۆەرتەر-دەفيبريللياتور يمپلانتاسيالاندى. اۋرۋدىڭ قولايسىز بولجامىن ەسكەرە وتىرىپ، اعىمداعى جىلدىڭ قاڭتارىندا UMC ماماندارى LVAD يمپلانتاسيالاۋ ۇسىنعان، ءبىراق ناۋقاس باس تارتتى. ەمدەۋدەن ناتيجە بولماعاندىقتان جۇرەك ترانسپلانتاسياسىن كۇتۋ تىزىمىنە قويىلدى.
«جۇرەك ترانسپلانتاسياسى بۇگىنگى كۇنى جۇرەك قىزمەتى جەتكىلىكسىزدىگىنىڭ سوڭعى ساتىسىنداعى ناۋقاستاردى ەمدەۋدەگى «التىن ستاندارتى» بولىپ تابىلادى. وكىنىشكە وراي، ونداي پاسيەنتتەردىڭ سانى جىلدان جىلعا ارتىپ كەلەدى. ترانسپلانتاسيانى قاجەت ەتەتىندەردىڭ بارلىعىنا ترانسپلانتاسيا جاساۋ مۇمكىندىگى شەكتەۋلى، سەبەبى دونورلىق ورگان جەتىسپەيدى. مىسالى، 2025 جىلعى 10 مامىرداعى جاعداي بويىنشا قازاقستاندا جۇرەك ترانسپلانتاسياسىن كۇتۋ پاراعىندا 139 ەرەسەك جانە 7 بالا تۇر»، – دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
مارات ورىنباسار ۇلى UMC «جۇرەك ورتالىعى» مەن ترانسپلانتتاۋدى جانە جوعارى تەحنولوگيالىق مەديسينالىق قىزمەتتى ۇيلەستىرۋ جونىندەگى رەسپۋبليكالىق ورتالىعىنا كومەك پەن قولداۋ كورسەتكەنى ءۇشىن العىسىن ءبىلدىردى.
دونوردىڭ جۇرەگى عانا ەمەس، سونىمەن قاتار 2 بالاعا بۇيرەگى ترانسپلانتاسيالانعانىن، ەكى ءمولدىرقابىعى الىنعانىن دا ايتا كەتۋ كەرەك.