الماتىدا كەنە ەنسەفاليتى جانە لايم اۋرۋىمەن سىرقاتتانعاندار سانى ارتتى. بۇل تۋرالى دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتىنەن ءمالىم ەتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«ەپيدەميالىق ماۋسىمنىڭ باسىنان باستاپ، 13 قازانعا دەيىن الماتىنىڭ مەديسينالىق ۇيىمدارىنا كەنە شاققان 3068 ادام جۇگىندى. ونىڭ ىشىندە بالالار سانى - 1513. 2021 جىلدىڭ سايكەس كەزەڭىمەن سالىستىرعاندا تۇرعىنداردىڭ كەنە شاعۋى 23،5% - عا ارتقان (2021 جىلى - 2344 جاعداي/ بالالار سانى-1260). كەنەنىڭ شاعۋىنان زارداپ شەككەن 3066 ادامعا سەروپروفيلاكتيكا جۇرگىزىلدى (99،9%)»،- دەلىنەدى ۆەدومستۆو حابارلاماسىندا.
بيىلعى جىلدىڭ 9 ايىندا 100 مىڭ تۇرعىنعا شاققانداعى 0،33 كورسەتكىشپەن كەنە ەنسەفاليتىنىڭ زەرتحانالىق راستالعان 7 جاعدايى تىركەلدى. 2021 جىلدىڭ سايكەس كەزەڭىندە كەنە ەنسەفاليتى تىركەلگەن جوق. سونداي-اق، مىڭ تۇرعىنعا شاققاندا 0،42 اۋرۋشاڭدىق كورسەتكىشىمەن لايم اۋرۋىنىڭ (كەنە بوررەليوزىنىڭ) 9 جاعدايى تىركەلدى. بۇل كورسەتكىش 2021 جىلدىڭ سايكەس كەزەڭىمەن سالىستىرعاندا 2،8 ەسە جوعارى (3 جاعداي، كورسەتكىش-0،15) بولدى.
«كەنە ەنسەفاليتى جانە لايم اۋرۋىمەن (كەنە بوررەليوزىمەن) اۋىرعاندار مەديسينالىق كومەك الۋ ءۇشىن تراۆماتولوگيالىق پۋنكتتەرگە ۋاقتىلى جۇگىنبەگەن، تيىسىنشە كەنەگە قارسى يممۋنوگلوبۋلين الماعان، سونداي-اق، پروفيلاكتيكالىق ماقساتتا بۇرىن كەنە ەنسەفاليتىنە قارسى ەكپە الماعان. دياگنوز قويىلعان سوڭ بارلىق ناۋقاستار قالاداعى ستاسيونارلاردا ەم الدى، ناتيجەسىندە ساۋىعىپ كەتتى»،- دەپ حابارلادى ۆەدومستۆودا.
قالا اۋماعىندا كەنە ارقىلى تاسىمالداناتىن اۋرۋلاردىڭ سپەسيفيكالىق ەمەس پروفيلاكتيكاسى ماقساتىندا (2424،54 گا الاڭدا) اكاريسيدتىك وڭدەۋ جۇرگىزىلدى. ساياباق جانە ورماندى ايماقتار، ادامداردىڭ دەمالاتىن، جاپپاي جينالاتىن ورىندارى وڭدەلدى.
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى كەنە ەنسەفاليتىنىڭ الدىن الۋدىڭ نەگىزگى شاراسى ۆاكسينالانۋ ەكەنىن ەسكە سالدى.
ۆاكسينالانۋ كۋرسى 1-7 اي ارالىعىندا ەكى ەكپە الۋدان تۇرادى. كەنە ەنسەفاليتىنە قارسى ەكپەنى جىل بويى الۋعا دا بولادى، دەگەنمەن، ەكىنشى ەكپەدەن كەيىنگى كەلەسى ەكپەنى 2 اپتا وتكەن سوڭ العان دۇرىس. ەڭ قولايلى كەزەڭ - ءبىرىنشى جانە ەكىنشى ۆاكسينالانۋ اراسىنداعى ينتەرۆال، ياعني، 5-7 اي (ءبىرىنشىسى كۇزدە، ەكىنشىسى كوكتەمدە) بولىپ تابىلادى. ۆاكسينالانۋدى كۇزدە باستاۋ كەرەك، سەبەبى، ەپيدەميالىق ماۋسىمنىڭ باسىندا ادام اعزاسى يممۋندىق قورعانىستى دامىتادى جانە ءقاۋىپتى ينفەكسياعا قارسى تۇرا الادى.
تۇراقتى يممۋنيتەت ءۇشىن ءبىر جىلدان سوڭ ءۇشىنشى ەكپەنى الۋ كەرەك. كەيىن يممۋنيتەتتى ساقتاۋ ءۇشىن ءۇش جىل سايىن ريەۆاكسيناسيالاۋ جۇرگىزۋ قاجەت. قالادا ەگۋدى تۇرعىلىقتى جەرى بويىنشا (نەمەسە تىركەلگەن جەرى بويىنشا) اۋماقتىق ەمحانالاردا دارىگەردىڭ كەڭەسىنەن كەيىن تەگىن الۋعا بولادى.
«ۆاكسينا العان ادامدار اۋىرعان جاعدايدا ولاردا اۋرۋ جەڭىل تۇردە وتەدى جانە سالدارى از بولادى. ۋاقتىلى ۆاكسينالانۋ ءسىزدى جانە جاقىندارىڭىزدى كەنە ەنسەفاليتى اۋرۋىنان قورعايدى»،- دەلىنگەن كوميتەت حابارلاماسىندا.