بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتىنىڭ ءبىلىم باسقارماسىنىڭ باسشىسى ءلاززات جىلقىبايەۆا ايتتى. سانيتارلىق تالاپتاردىڭ ساقتالۋىنا ەرەكشە نازار اۋدارىلاتىن بولادى، دەپ حابارلايدى almaty-akshamy.kz
ءلاززات جىلقىبايەۆانىڭ ايتۋىنشا، الماتىدا 278 جالپى ءبىلىم بەرەتىن مەكتەپ بار، ونىڭ 207ء-سى مەملەكەتتىك، 71ء-ى جەكەمەنشىك. تاعى 8 جەكەمەنشىك مەكتەپ 1 قىركۇيەكتە اشىلاتىن بولادى.
«شامامەن قالا مەكتەپتەرىندە 1-دەن 11-سىنىپقا دەيىن 280 مىڭنان استام بالا وقيدى. بۇگىندە 30 مىڭعا جۋىق بالا ءبىرىنشى سىنىپقا بارادى»، - دەدى ءلاززات جىلقىبايەۆا.
ءبىلىم باسقارماسىنىڭ باسشىسى مەكتەپتەردە بەلسەندى دايىندىق ءجۇرىپ جاتقانىن، دەنساۋلىعىنا بايلانىستى ەمدەلىپ جۇرگەندەردى قوسپاعاندا، مەملەكەتتىك ءبىلىم بەرۋ ۇيىمدارىنىڭ قىزمەتكەرلەرىنىڭ 100% ەكپە العانىن اتاپ ءوتتى.
«ءبىز بالالاردىڭ وفلاين رەجيمىندە وقۋىن قامتاماسىز ەتۋ ءۇشىن بار كۇشىمىزدى سالىپ جاتىرمىز، ويتكەنى مۇعالىمدەر مەن وقۋشىلار اراسىنداعى تىكەلەي قارىم-قاتىناستى ەشتەڭە الماستىرا المايدى. بۇگىندە بارلىق ءبىلىم بەرۋ ۇيىمدارى Ashyq جوباسىنىڭ قاتىسۋشىلارى بولىپ تابىلادى جانە قاجەتتى مولشەردە دەزينفەكسيالاۋشى جانە انتيسەپتيكالىق زاتتارمەن قامتاماسىز ەتىلگەن»، - دەپ قوستى ءلاززات جىلقىبايەۆا.
ءداستۇرلى وقىتۋ فورماتىنا كوشۋ قاتاڭ سانيتارلىق-ەپيدەميولوگيالىق تالاپتاردى ساقتاي وتىرىپ جۇزەگە اسىرىلاتىن بولادى.
«مەكتەپتەردە تەمپەراتۋرانى ولشەۋ، ۆيزۋالدى تەكسەرۋ، جەلدەتۋ، كۆارس، تازالاۋ، ىشكى رەجيم، ەسىك تۇتقالارىن انتيسەپتيكپەن وڭدەۋ، دارەتحانانى ءجيى جۋىپ تۇرۋ ءار 2-3 ساعات سايىن جۇرگىزىلەدى»، - دەيدى ءبىلىم باسقارماسىنىڭ باسشىسى.
سونىمەن قاتار، باستاۋىش، ورتا جانە جوعارى سىنىپ وقۋشىلارىنىڭ مەكتەپكە بولەك (بالالار الەۋمەتتىك قاشىقتىقتى ساقتاۋ ءۇشىن مەكتەپكە ءار ءتۇرلى كىرەبەرىستەن جىبەرىلەدى) كىرۋى قاراستىرىلعان.
ءلاززات جىلقىبايەۆا الماتىدا وقۋشىلاردىڭ مەكتەپ فورماسىنا قويىلاتىن تالاپتار ساقتالعانىن باسا ايتتى. سونىمەن بىرگە كلاسسيكالىق ستيلدەگى ىڭعايلى كيىممەن مەكتەپكە بارۋعا رۇقسات ەتىلەدى.
ايتا كەتەرلىگى، بيىل ءبىلىم كۇنى مەكتەپ اۋماعىندا لينەيكا فورماتىندا اشىق اسپان استىندا بارلىق مەكتەپتەردىڭ 1 سىنىپ وقۋشىلارىنا ارنالعان الىپپە/بۋكۆار تاپسىرۋىمەن وتەدى.
2-11 سىنىپ وقۋشىلارى ءۇشىن بەكىتىلگەن اۋديتوريالاردا سىنىپ ساعاتى وتەدى.