قالپىنا كەلتىرۋ جۇمىستارى 22 ناۋرىزعا دەيىن جۇرگىزىلەدى
قاڭتارداعى جاپپاي ءتارتىپبۇزۋشىلىق كەزىندە گوگول مەن پۋشكين كوشەلەرى قيىلىسىنداعى 28 پانفيلوۆشى ساياباعىندا 9 شارشى مەتر گرانيت تاقتايشا قيراتىلىپ، كىرەبەرىستەگى جازۋدىڭ 5 ءارپى ۇرلانعان بولاتىن. سونداي-اق ماڭگىلىك الاۋ ماڭىنان 2 ءارىپ ۇرلانىپ، جاۋىنگەرلەردىڭ اتى جازىلعان 4 شويىن ەسكەرتكىش بۇزىلدى. قالپىنا كەلتىرۋ جۇمىستارى اقپان ايىندا اياقتالدى.
الايدا قالپىنا كەلتىرۋ جۇمىستارى اياقتالعاننان كەيىن 4 ناۋرىز ساعات 10:00-دە گوگول كوشەسى جاعىنداعى كىرەبەرىستەگى تاعى 2 ءارىپتىڭ جانە ەسكەرتكىشتەن 8 شويىن ماڭدايشانىڭ جوعالعاندىعى انىقتالدى، دەپ حابارلايدى Almaty-akshamy.kz
5 ناۋرىزدا 2 قولا ءارىپتىڭ ۇرلانعاندىعى انىقتالدى. بۇزىلعان گرانيت پەن جوعالعان ارىپتەردىڭ جالپى شىعىنى 5،7 ملن. تەڭگە بولدى.
جوعارىدا اتالعان فاكتىلەردى الماتى قالاسىنىڭ پوليسيا دەپارتامەنتى تىركەپ، ساياباقتاعى پوليسيا جۇمىسى كۇشەيتىلدى.
"قالپىنا كەلتىرۋ جۇمىستارى 22 ناۋرىزعا دەيىن جۇرگىزىلەتىن بولادى. تاريحي ەسكەرتكىشتەرگە قاتىستى ۆانداليزم فاكتىلەرىنىڭ جيىلەپ كەتكەندىگىنە بايلانىستى قالا اكىمدىگى الماتىلىقتاردى قالا مۇلكىنە مۇقيات قاراپ، ءوز تاريحىمىزعا سىيلاستىق تانىتۋعا شاقىرادى"، - دەلىنگەن حابارلامادا.