الماتىدا 2024 جىلى 11،7 مىڭ وقۋشى ورنىمەن قامتاماسىز ەتكەن 18 ءبىلىم بەرۋ نىسانى سالىندى. وسى شارالاردىڭ ارقاسىندا كەلەسى وقۋ جىلىنا دەيىن ورىن تاپشىلىعى «باسقارىلاتىن» دەڭگەيگە – 3-4 مىڭ ورىنعا دەيىن قىسقارادى. بۇل تۋرالى قالالىق ءبىلىم باسقارماسى حابارلادى.
ءبىلىم بەرۋدى دامىتۋدىڭ ماڭىزدى بولىگى «الماتى مەكتەپتەرى» ستاندارتىنىڭ ەنگىزىلۋى بولدى. وسى جوبا اياسىندا مەملەكەتتىك مەكتەپ وقۋشىلارىن تاسىمالداۋ ۇيىمداستىرىلدى. 2024 جىلى مەكتەپ اۆتوبۋستارىنىڭ سانى 200 بىرلىككە دەيىن ارتتى، بۇل 15،3 مىڭ وقۋشىنى تاسىمالداۋعا مۇمكىندىك بەردى. 2025 جىلى الماتى اكىمى ەربولات دوسايەۆتىڭ تاپسىرماسىمەن اۆتوبۋستار سانى تاعى 100 بىرلىككە كوبەيتىلىپ، بۇل ودان دا كوپ وقۋشىنى وقۋ ورىندارىنا ءقاۋىپسىز جانە ىڭعايلى جەتكىزۋگە مۇمكىندىك بەرەدى.
بۇعان دەيىن اۆتوبۋستار شالعاي جانە جەتۋى قيىن اۋدانداردا تۇراتىن بالالار وقيتىن مەكتەپتەردەن تۇسكەن وتىنىمدەرگە سايكەس مارشرۋتتارعا شىعاتىنى اتاپ وتىلگەن. بۇل مەكتەپ اۆتوبۋستارىن ءبولۋ كەزىندەگى باسىمدىقتاردىڭ ءبىرى. ءار مەكتەپ ءۇشىن وقۋشىلاردى تاسىمالداۋدى قامتاماسىز ەتۋ ماقساتىندا ەگجەي-تەگجەيلى مارشرۋتتىق پاراقتار ازىرلەنگەن.