راديوەلەكترونيكا جانە بايلانىس اسكەري-ينجەنەرلىك ينستيتۋتىندا مەكتەپ وقۋشىلارىنا ارنالعان اشىق ەسىك كۇنى ءوتتى.
جاسوسپىرىمدەرگە اسكەري ينستيتۋتقا قابىلداۋ ءتارتىبى جانە مۇندا وقۋدىڭ ارتىقشىلىقتارى جايىندا ايتىلدى، دەپ حابارلايدى Almaty-akshamy.kz قورعانىس مينيسترلىگىنىڭ سايتىنا سىلتەمە جاساپ.
جوعارى وقۋ ورنىنىڭ كافەدرالارىنا بارعان كەزدە وقىتۋشىلار ءار ماماندىقتىڭ وزىنە ءتان ەرەكشەلىكتەرى تۋرالى جان-جاقتى اڭگىمەلەپ بەردى. بالالار وقۋ سىنىپتارىن ارالاپ، كازارمادا، سپورت زالىندا جانە اسحانادا بولدى.
«ءبىزدىڭ جوعارى وقۋ ورنىندا بەس ينجەنەرلىك-تەحنيكالىق ماماندىق بويىنشا وفيسەرلەردى وقىتادى. بۇگىنگى تاڭدا مۇنداي سالا ماماندارى تەك قارۋلى كۇشتەردە عانا ەمەس، سونىمەن قاتار ەكونوميكانىڭ ناقتى سەكتورىندا دا سۇرانىسقا يە. سوندىقتان ءبىزدىڭ ينستيتۋتتا ءبىلىم الۋ مۇمكىندىگىن جىبەرىپ الماڭدار»، - دەدى وقۋشىلارمەن كەزدەسۋ بارىسىندا راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ باستىعى پولكوۆنيك قايرات ءداۋىتوۆ.
وقۋشىلارعا وقۋ-جاۋىنگەرلىك تەحنيكا مەن اتىس قارۋى ۇلگىلەرىنىڭ كورمەسى ۇيىمداستىرىلدى. نۇسقاۋشىلار اۆتوماتتى بولشەكتەپ-قۇراستىرۋ ادىستەرىن كورسەتتى، جالپىاسكەري قورعانىس جيىنتىعىن كيۋ ەرەجەلەرىمەن تانىستىردى.
«بالا كۇنىمنەن اسكەري ادام بولۋدى ارماندايمىن. بۇگىن مەن كوپتەگەن قىزىقتى جانە پايدالى اقپارات الدىم. وسى وقۋ ورنىنا تۇسەمىن»، – دەدى № 95ء-شى جالپى ءبىلىم بەرۋ مەكتەبى "جاس سارباز" 9-سىنىبىنىڭ وقۋشىسى ارتەم سميرنوۆ.
جوعارى وقۋ ورنىن ارالاۋ باعدارلاماسى بويىنشا ارميا قويان-قولتىق ۇرىسىنىڭ ەلەمەنتتەرى جانە اسكەري انسامبل ارتىستەرىنىڭ ونەرى كورسەتىلدى.
وقۋشىلار ۇيىمداستىرۋشىلارعا تانىمدىق ەكسكۋرسيا ءۇشىن ريزاشىلىعىن ءبىلدىردى. بۇل ولاردىڭ كەيبىرى ءۇشىن ماماندىق تاڭداۋدا ماڭىزدى قادام بولۋى مۇمكىن.