بوستاندىق اۋدانىنىڭ تۇرعىندارىمەن كەزدەسۋدە الماتى اكىمى ەربولات دوسايەۆ ءبىلىم بەرۋ ينفراقۇرىلىمىن دامىتۋ شارالارى تۋرالى ايتتى.
ۇلتتىق «جايلى مەكتەپ» جوباسى اياسىندا بيىل 4 مىڭ ورىنعا ارنالعان 2 جاڭا مەكتەپتىڭ قۇرىلىسى اياقتالادى: مامىر ايىندا – روزىباكييەۆ كوشەسىندە، تامىز ايىندا – ەگىزبايەۆ كوشەسىندە.
«بيىل قىركۇيەك ايىندا №73 مەكتەپ عيماراتىن قايتا جاڭارتۋ جانە 450 ورىنعا ارنالعان قوسىمشا عيمارات قۇرىلىسىن اياقتاۋ جوسپارلانعان. 2025 جىلدىڭ سوڭىنا دەيىن №10 مەكتەپ-ينتەرناتى مەن №189، №191 مەكتەپتەرى سەيسميكالىق تۇرعىدا نىعايتىلىپ، كۇردەلى جوندەۋ جۇمىستارى اياقتالادى، سونداي-اق، رەسپۋبليكالىق فيزيكا-ماتەماتيكا مەكتەبىنىڭ عيماراتى رەكونسترۋكسيالاۋدان وتەدى. ال №60 مەكتەپتىڭ رەكونسترۋكسياسى وسى جىلدىڭ ءساۋىر ايىندا باستالىپ، 2026 جىلدىڭ قىركۇيەگىندە اياقتالادى»، – دەدى ەربولات دوسايەۆ.
مەكتەپكە دەيىنگى ءبىلىم بەرۋ مەكەمەلەرىنىڭ جەلىسىن كەڭەيتۋ جۇمىستارى دا قارقىندى جۇرگىزىلۋدە. 2025 جىلدىڭ ناۋرىزىنا دەيىن وربيتا-3 شاعىن اۋدانىنداعى بۇرىنعى بالالار ءۇيىنىڭ ەكى عيماراتى قايتا جاڭعىرتىلادى. ونىڭ بىرەۋى 240 ورىندىق بالاباقشاعا، ال ەكىنشىسى ەرەكشە ءبىلىم بەرۋ قاجەتتىلىگى بار بالالارعا ارنالعان 100 ورىندىق تۇزەتۋ بالاباقشاسىنا اينالادى.
سونىمەن قاتار، №81، №87 جانە №137 بالاباقشالارىندا سەيسميكالىق نىعايتىلىپ، كۇردەلى جوندەۋ جۇمىستارى جۇرگىزىلىپ جاتىر، ولار 2025 جىلدىڭ سوڭىندا اياقتالادى.
ايتا كەتەيىك، 2024 جىلى بوستاندىق اۋدانىندا 801 بالاعا ارنالعان 15 جەكە بالاباقشا اشىلدى. «بالالاردىڭ قوسىمشا ءبىلىم الۋى مەن دامۋىنا قولايلى جاعداي جاساۋ ماقساتىندا بۇعان دەيىن ۆاحتانگوۆ كوشەسىندە ورنالاسقان 1964 جىلى سالىنعان وقۋشىلار ءۇيىنىڭ ەسكى عيماراتىن بۇزۋ تۋرالى شەشىم قابىلدانعان بولاتىن. ونىڭ ورنىنا بارلىق زاماناۋي ستاندارتقا ساي جاڭا عيمارات سالىندى. ءساۋىر ايىندا ءبىز بالالارىمىز ءۇشىن اشۋدى جوسپارلاپ وتىرمىز»، – دەدى ەربولات دوسايەۆ.
قازىرگى زامانعا ساي ەكى قاباتتى عيماراتتا 12 شىعارماشىلىق كابينەت، پىكىرتالاس كلۋبى، باعدارلامالاۋ، 3D مودەلدەۋ، قۇرىلىمداۋ، فوتو جانە بەينەمونتاج ۇيىرمەلەرى اشىلادى. وقۋشىلار ۇيىندە اپتاسىنا 5-17 جاس ارالىعىنداعى 2 مىڭ بالا ءبىلىم الا الادى.
ايتا كەتەيىك، بۇعان دەيىن الماتىنىڭ المالى اۋدانىندا دا جاڭا زاماناۋي وقۋشىلار ءۇيى سالىنعان بولاتىن. وندا كۇن سايىن 400 بالا ءبىلىم الادى.