الماتىنىڭ المالى اۋدانىندا قالا اكىمىنىڭ تاپسىرماسىمەن جىل سوڭىنا دەيىن 13 بالاباقشا جوندەلەدى
المالى اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ الەۋمەتتىك ينفراقۇرىلىمدى دامىتۋ بويىنشا جۇرگىزىلىپ جاتقان جۇمىستار تۋرالى ايتتى، دەپ حابارلايدى aqshamnews.kz
«وقۋشى ورىندارىنىڭ تاپشىلىعىن ازايتۋ ماقساتىندا مەكتەپ سالۋ بويىنشا جوسپارلى جۇمىس جۇزەگە اسىرىلىپ جاتىر. «جايلى مەكتەپ» ۇلتتىق جوباسى اياسىندا رايىمبەك داڭعىلى مەن اۋەزوۆ كوشەسىنىڭ قيىلىسىندا 1،5 مىڭ ورىندى مەكتەپ قۇرىلىسى جالعاسىپ وتىر. بۇل جۇمىس بيىل جەلتوقساندا ءبىتۋى كەرەك»، - دەدى ەربولات دوسايەۆ.
قالا باسشىسىنىڭ ايتۋىنشا، قىركۇيەك ايىندا №136 مەكتەپ-گيمنازيا عيماراتى كۇردەلى جوندەۋدەن ءوتىپ، سەيسميكالىق كۇشەيتۋ جۇمىستارى اياقتالادى. سونىمەن قاتار، №58 مەكتەپكە 600 ورىندى قوسىمشا قۇرىلىس سالىنىپ جاتىر، نىساندى 2025 جىلدىڭ جەلتوقسانىندا اياقتاۋ جوسپارلانۋدا. سونداي-اق، قازان ايىندا №16 مەكتەپكە 300 ورىندىق قوسىمشا قۇرىلىس سالۋعا مەملەكەتتىك ساراپتامانىڭ وڭ قورىتىندىسى شىقپاق. قۇرىلىس جۇمىستارى كەلەسى جىلى 1 توقساندا باستالادى.
«مەكتەپكە دەيىنگى ءبىلىم بەرۋ سالاسىندا بيىل ماۋلەنوۆ كوشەسىندەگى عيماراتتى سەيسميكالىق كۇشەيتە وتىرىپ كۇردەلى جوندەۋ جوسپارلانۋدا، وندا 145 ورىندىق بالاباقشا اشىلادى. ول 2025 جىلدىڭ 3 توقسانىندا اياقتالادى. بۇگىنگى تاڭدا تاستاق شاعىن اۋدانىندا قولدانىستاعى عيماراتتاردى بۇزىپ، بالاباقشا سالۋعا جسق ازىرلەنۋدە. سونداي-اق، وسى جىلدىڭ جەلتوقسان ايىنا دەيىن 13 بالاباقشانىڭ ماتەريالدىق-تەحنيكالىق بازاسىن جاڭارتىلىپ، اعىمداعى جوندەۋ جۇمىستارى اياقتالادى»، - دەدى ەربولات دوسايەۆ.
الەۋمەتتىك باعىتتاعى نىساندارعا «قادامدىق قولجەتىمدىلىكتى» قۇرۋ بويىنشا اتقارىلىپ جاتقان جۇمىستارعا توقتالعان الماتى اكىمى جامبىل مەن بايزاقوۆ كوشەلەرىنىڭ قيىلىسىندا جاڭا زاماناۋي وقۋشىلار ءۇيىنىڭ قۇرىلىسى باستالعانىن اتادى. 1951 جىلى سالىنعان ەسكى عيماراتقا سەيسميكالىق كۇشەيتۋ جۇمىستارى جۇرگىزىلمەدى، وسىعان بايلانىستى ونى بۇزۋ جانە جاڭاسىن سالۋ تۋرالى شەشىم قابىلداندى. نىساندى 2025 جىلدىڭ ءبىرىنشى توقسانىندا پايدالانۋعا بەرۋ جوسپارلانىپ وتىر.