الماتىدا 18 ەلدىڭ شاحماتشىلارى ازيا چەمپيونى اتاعى مەن فيدە-2023 الەم چەمپيوناتىنا جولداما الۋ ءۇشىن كۇرەسۋدە
كەشە الماتى قالاسىندا ازيا چەمپيونى اتاعى ءۇشىن ينتەللەكتۋالدىق تارتىس باستالدى. جەكسەنبى كۇنى بالۋان شولاق اتىنداعى سپورت سارايىندا شاحماتتان ازيا قۇرلىقتىق چەمپيوناتىنىڭ رەسمي اشىلۋ سالتاناتى مەن ءبىرىنشى تۋرى ءوتتى، دەپ حابارلايدى Almaty-akshamy.kz.
سالتاناتتى شارانى ءتۋرنيردىڭ بارلىق قاتىسۋشىلارىن قۇتتىقتاپ، ساتتىلىك تىلەگەن الماتى قالاسى اكىمىنىڭ ورىنباسارى ارمان قىرىقبايەۆ، قازاقستان شاحمات فەدەراسياسىنىڭ (قشف) پرەزيدەنتى، Freedom Holding Corp باس ديرەكتورى تيمۋر تۋرلوۆ جانە ازيا شاحمات فەدەراسياسىنىڭ باس حاتشىسى حيشام ال-تاحەر اشتى.
تيمۋر تۋرلوۆ قازاقستان 2023 جىلى مەملەكەت باسشىسىنىڭ قولداۋىنىڭ ارقاسىندا شاحماتتىڭ ناعىز ورتالىعىنا اينالعانىن اتاپ ءوتتى.
«حالىقارالىق جارىستاردى ءجيى وتكىزۋ ەلىمىزدە شاحماتتى دامىتۋعا ءارى ءبىزدىڭ شاحمات فەدەراسياسىنىڭ جۇمىسىن كۇشەيتۋگە كومەكتەسەدى، وسىلايشا بولاشاقتا بۇدان دا كوپ چەمپيوندار، مىقتى شاحماتشىلار شىعادى»، – دەدى ول.
قشف پرەزيدەنتى شاحماتتان ازيا قۇرلىقتىق چەمپيوناتىندا كورەرمەندەردى قىزىقتى ينتەللەكتۋالدىق ويىندار كۇتىپ تۇرعانىنا جانە تۋرنير ونداعان، جۇزدەگەن مىڭ قازاقستاندىق بالالاردى وسى تاماشا ويىندى بەلسەندى ۇيرەنۋگە شابىتتاندىراتىنىنا سەنىم ءبىلدىردى.
ءوز كەزەگىندە حيشام ال-تاحەر قازاقستان پرەزيدەنتى قاسىم-جومارت توقايەۆقا ەلىمىزدەگى شاحماتتى دامىتۋعا قولداۋ كورسەتكەنى ءۇشىن، الماتى قالاسىنىڭ اكىمى ەربولات دوسايەۆ پەن تيمۋر تۋرلوۆقا چەمپيوناتتى وسىنداي جوعارى دەڭگەيدە ۇيىمداستىرعانى ءۇشىن العىسىن ءبىلدىردى.
اشىلۋ سالتاناتىنان كەيىن 1 تۋر ءوتتى. Open-چەمپيوناتتىڭ ءبىرىنشى تۋرىنىڭ قورىتىندىسى بويىنشا قازاقستاندىق گروسسمەيستەر رينات جۇمابايەۆ قارسىلاسىنا از دا بولسا مۇمكىندىك بەرمەي تازا جەڭىسكە جەتتى. سونىمەن قاتار مۇرتاس قاجگالەيەۆ، دەنيس ماحنيەۆ، نوگەربەك قازىبەك جانە باسقالار جەڭىمپاز اتاندى.
ايەلدەر چەمپيوناتىنىڭ ءبىرىنشى تۋرىنىڭ قورىتىندىسى بويىنشا قازاقستاندىق شاحماتشىلار: ارناش باۋىرجان، ليا قۇرمانعالييەۆا، كسەنيا بالابايەۆا، امينا قايىربەكوۆا جەڭىسكە جەتتى.
ەسكە سالايىق، شاحماتتان ەرلەر اراسىنداعى اشىق بىرىنشىلىك پەن ايەلدەر اراسىنداعى چەمپيوناتتى قامتيتىن ازيا قۇرلىقتىق چەمپيوناتى شۆەيساريا جۇيەسى بويىنشا، فيدە ەرەجەسىنە سايكەس 9 تۋردان تۇرادى. وعان ازيانىڭ 18 ەلىنەن 128 مىقتى ويىنشى قاتىسۋدا. جارىس اعىمداعى جىلدىڭ 12 ماۋسىمىنا دەيىن جالعاسادى. شارانىڭ جۇلدە قورى 100 000 اقش دوللارىن قۇرايدى.
اشىق چەمپيوناتتىڭ ءتورت جەڭىمپازى جانە ايەلدەر چەمپيوناتىنىڭ ەكى جەڭىمپازى بيىلعى جىلدىڭ 29 شىلدەسى مەن 25 تامىزى ارالىعىندا باكۋدە وتەتىن فيدە–2023 الەم چەمپيوناتىنا قاتىسۋ قۇقىعىنا يە بولادى. الەم كۋبوگىنىڭ جەڭىمپازدارى شاحمات الەمىندەگى ەڭ جوعارى اتاق – شاحماتتان الەم چەمپيونى اتاعى ءۇشىن تالاسادى.
شاحماتتان ازيا قۇرلىقتىق چەمپيوناتىن ۇيىمداستىرۋشىلار – قازاقستان رەسپۋبليكاسى مادەنيەت جانە سپورت مينيسترلىگى، ازيا شاحمات فەدەراسياسى، الماتى قالاسى اكىمدىگىنىڭ قولداۋىمەن قازاقستان شاحمات فەدەراسياسى. ءتۋرنيردىڭ باس سەرىكتەسى – Freedom Holding Corp.