قارجىلىق مونيتورينگ اگەنتتىگىنىڭ الماتى قالاسى بويىنشا دەپارتامەنتى ۇيىمداسقان قىلمىستىق توپتىڭ بەس مۇشەسىنە قاتىستى سوتقا دەيىنگى تەرگەۋدى اياقتادى، دەپ حابارلايدى اlmaty-akshamy.kz.
توپ مۇشەلەرى 2018-2020 جىلدار ارالىعىندا ءوز باقىلاۋىنداعى 25 كومپانيا ارقىلى 135 ملرد تەڭگەگە جۋىق سوماعا جالعان شوت-فاكتۋرا جازعان.
وسىلايشا كونتراگەنت-ساتىپ الۋشىلار بيۋدجەتكە تولەنبەگەن سالىق تۇرىندە مەملەكەتكە 39 ملرد تەڭگەگە جۋىق شىعىن كەلتىرگەن.
سونداي-اق، تەرگەۋ بارىسىندا كونتراگەنت-ساتىپ الۋشىلاردىڭ باقىلاۋداعى كومپانيالاردىڭ بانك شوتىنا تۇسكەن قاراجاتى شەتەل كومپانيالارىمەن جالعان شارت جاساسۋ ارقىلى رەسپۋبليكادان تىس جەرلەرگە شىعارىلعانى، وندا شەتەل ۆاليۋتاسىنداعى قايتارىلماعان قاراجاتتىڭ سوماسى 6،6 ملن اقش دوللارىن قۇراعانى انىقتالدى.
سوت ۇكىمىمەن بەس ايىپتالۋشىنىڭ ءبارى كىنالى دەپ تانىلىپ، ولارعا 5 جىلدان 7 جىلعا دەيىن باس بوستاندىعىنان ايىرۋ جازاسى تاعايىندالدى.
تاركىلەنگەن 65 مىڭ اقش دوللارى مەن 20 ملن تەڭگەدەن استام قارجى مەملەكەت كىرىسىنە الىندى.