الماتى قالاسىنىڭ اۋەجايىندا "Bek Air" اۋەكومپانياسىنىڭ "Fokker-100"ماركالى اۋە كەمەسىنىڭ اپاتقا ۇشىراۋ فاكتىسى بويىنشا قىلمىستىق ءىستى تەرگەۋ اياقتالدى، دەپ حابارلايدى Almaty-akshamy.kz.
كولىكتەگى پوليسيا دەپارتامەنتى پروسەسس پروكۋرورمەن كەلىسە وتىرىپ، الماتى اۋەجايىندا 2019 جىلدىڭ 27 جەلتوقسانىندا ورىن العان «Fokker-100» «Bek Air» ۇشاعىنىڭ اپاتقا ۇشىراۋى فاكتىسى تۋرالى قىلمىستىق ءىس بويىنشا تەرگەۋ ارەكەتتەرىنىڭ اياقتالعانىن حابارلادى.
«4 مىڭنان اسا تەرگەۋ ارەكەتى (2000 تەكسەرۋ، 1350 جاۋاپ الۋ، 250 الۋ)، 150 سوت-مەديسينالىق ساراپتاما جانە ارنايى زەرتتەۋلەر جۇرگىزىلدى. حالىقارالىق ىنتىماقتاستىق شەڭبەرىندە پروكۋراتۋرا قازاقستان رەسپۋبليكاسى سىرتقى ىستەر مينيسترلىگىنىڭ كومەگىمەن بەلگيا، گەرمانيا، ليۋكسەمبۋرگ، نيدەرلاندى جانە ت.ب. شەت مەملەكەتتەردەن حالىقارالىق قۇقىقتىق كومەك كورسەتۋ تۋرالى وتىنىشتەرگە ءىس ءۇشىن ماڭىزى بار قاجەتتى قۇقىقتىق-تەحنيكالىق اقپارات الىندى»، - دەلىنگەن حابارلامادا.
ءقازىر پروسەسكە قاتىسۋشىلار سوتقا دەيىنگى تەرگەپ-تەكسەرۋ ماتەريالدارىمەن تانىسىپ جاتىر.
ەسكە سالساق، 2019 جىلدىڭ 27 جەلتوقسانىندا الماتىدا جانتۇرشىگەرلىك ۇشاق اپاتى بولدى. Bek Air اۋەكومپانياسىنىڭ ۇشاعى الماتى اۋەجايىنىڭ ماڭىندا اپاتقا ۇشىرادى. بورتتا 93 جولاۋشى مەن ەكيپاجدىڭ 5 مۇشەسى بولدى. اپات سالدارىنان 12 ادام قازا بولدى.