2022 جىلدىڭ 29 قاراشاسى مەن 3 جەلتوقسانى ارالىعىندا الماتىدا «باستاۋ» X حالىقارالىق ستۋدەنتتىك جانە دەبيۋتتىك فيلمدەر كينوفەستيۆالى وتەدى.
فەستيۆالدى Tanaris Production كينوكومپانياسى الماتى قالاسىنىڭ اكىمدىگىنىڭ قولداۋىمەن ۇيىمداستىرادى، دەپ حابارلايدى Almaty-akshamy.kz.
فەستيۆالدىڭ سەرىكتەستەرى – ق ر مادەنيەت جانە سپورت مينيسترلىگى، ت. جۇرگەنوۆ اتىنداعى قازاق ۇلتتىق ونەر اكادەمياسى، «تۇران» ۋنيۆەرسيتەتىنىڭ Turan Film Academy جوعارى مەكتەبى جانە ءال-فارابي اتىنداعى قازاق ۇلتتىق ۋنيۆەرسيتەتى.
فەستيۆالدىڭ ماقساتى – الەم ەلدەرىنىڭ جاس كينەماتوگرافيستەرى اراسىنداعى بايلانىستى نىعايتۋ، ولاردىڭ جۇمىسىن قولداۋ جانە ىلگەرىلەتۋ. فەستيۆال پرەزيدەنتى سەرگەي ءازىموۆ ايتقانداي، «باستاۋ» جاس رەجيسسەرلەر مەن سەناريستەرگە ءوز جوبالارىن جۇزەگە اسىرۋ ءۇشىن بىرەگەي الاڭ ۇسىنادى. «باستاۋ» ون جىل بويى ءۇزىلىسسىز جۇمىس ىستەپ كەلەدى جانە فەستيۆالدىڭ كاسىبي جانە ۇيىمشىل ۇجىمىنىڭ ارقاسىندا بارلىق قيىندىقتى ەڭسەرىپ وتىر.
«سوندىقتان ءبىز ءۇشىن باستى يدەيا، نەگىزگى تۇجىرىمداما مىنانداي بولدى: ءبارىمىز – ۇيىمداستىرۋشىلار، باسشىلار – ەڭ جوعارى كاسىبي ماعىناداعى قىزمەت كورسەتۋشى پەرسونال بولۋىمىز كەرەك. ءبىز وسى وقيعانىڭ باستى كەيىپكەرلەرى – اۆتورلار، رەجيسسەرلەر، وپەراتورلار، دراماتۋرگتەر، جاس اكتەرلەر اينالاسىندا قۇرىلعان ينفراقۇرىلىمدى جاسايمىز. ءبىز ولارعا وسىنى سەزىندىرۋىمىز كەرەك»، – دەيدى ول.
بيىلعى جىلى فەستيۆال رەجيسسەر يانا سكوپينانىڭ «سكورو كونچيتسيا لەتو» اتتى ءفيلمىنىڭ تۇساۋكەسەرىمەن اشىلادى. بۇل - ونىڭ تولىقمەتراجدى دەبيۋتى. يانا «باستاۋ» تۇلەگى، ونىڭ العاشقى تۋىندىسى «تى چتو-تو پرياچەش ۆ كۋلاكە» اتتى قىسقامەتراجدى ءفيلمى V «باستاۋ» حكف-دا ۇزدىك دەپ تانىلعان. 2015 جىلى جۇلدە العاندا، ساحنادا ۇلكەن كارتينامەن وسىندا ورالۋعا ۋادە بەرگەن ەدى. ونىڭ جاڭا كينوسىنىڭ سيۋجەتى 1990 جىلى كوپ ۇلتتى اۋلادا ءبىر جازدىڭ وقيعاسىنا نەگىزدەلگەن. ول «كينو» توبىنىڭ مۋزىكاسىنا جانە وزگەرىس سەزىمىنە تولى. باستى كەيىپكەر باحا ەسىمدى جاس جىگىت پولياك قىزىنا عاشىق بولادى…
فەستيۆال 29 قاراشادا اباي اتىنداعى قازاق ۇلتتىق وپەرا جانە بالەت تەاترىندا اشىلادى. Chaplin Cinemas كينوتەاترىندا جابىلۋى وتەدى.
فەستيۆال جاڭالىقتارىن bastauiff.com سايتىنان جانە ءبىزدىڭ bastauiff – Instagram جانە Facebook پاراقشامىزدان كورىڭىزدەر.