دۇنيەجۇزىلىك ازاماتتىق قورعانىس كۇنىنە ارنالعان ءىس-شارالار اياسىندا الماتى قالاسىنىڭ توتەنشە جاعدايلار دەپارتامەنتى «الماتى قالاسىنىڭ قۇتقارۋ قىزمەتىمەن» جانە ق ر تجم اۋماقتىق بولىمشەلەرىمەن بىرگە 2024 جىلعى 1 ناۋرىزدا ساعات 10.00-دەن 12.00-گە دەيىن «استانا» الاڭىندا ءورت ءسوندىرۋ، قۇتقارۋ جانە باسقا دا ارنايى قۇرال-جابدىقتاردىڭ كورمەسىن وتكىزەدى، دەپ حابارلايدى almaty-akshamy.kz
دۇنيەجۇزىلىك ازاماتتىق قورعانىس كۇنىنە ارنالعان كورمەدەن الماتىلىقتار قالانىڭ اۆاريالىق-قۇتقارۋ كۇشتەرىنىڭ ارنايى قۇرال-جابدىقتارىمەن تانىسۋعا مۇمكىندىك الادى.
- دەمونستراسيالىق كورمە - ازاماتتىق قورعاۋ جانە قاۋىپسىزىدىك مادەنيەتىن قالىپتاستىرۋ سالاسىنداعى ءبىلىمدى ناسيحاتتاۋ ماقساتىندا ۇيىمداستىرىلادى، سونداي-اق قالا تۇرعىندارىن قۇتقارۋ قىزمەتتەرى مەن قۇرالىمداردىڭ مۇمكىندىكتەرىمەن تانىستىرۋ ءۇشىن وتكىزىلەدى.
- 3000-دەن استام وقۋشى مەن ستۋدەنت ءورت ءسوندىرۋشى–قۇتقارۋشى مامانداعىنىڭ ەرەكشەلىكتەرىمەن تانىسا الادى، ولاردىڭ ىشىندە «جاس قۇتقارۋشى» مەكتەپ جانىنداعى كلۋبتاردىڭ مۇشەلەرى دە بار.
- سونىمەن بىرگە ۇتقىر پلاتفورماداعى جەر سىلكىنىستەرىنىڭ سيمۋلياتورى كورسەتىلەدى. بۇل ترەناجەر جەر سىلكىنىسىنىڭ كولدەنەڭ جانە تىك دۇمپۋلەرىن ۇقساتاتىن ءۇي بولمەسىنىڭ ماكەتىندە كورسەتىلگەن.
- 90 مەتر بيىكتىكتەن ادامداردى قۇتقارۋعا ارنالعان قازاقستانداعى ەڭ بيىك ءيىندى كوتەرگىشتى جاقىن جەردەن كورۋگە بولادى.
ەسكە سالا كەتەتىنى، حالىقارالىق ازاماتتىق قورعانىس ۇيىمى (حاقۇ) باس اسسامبلەياسىنىڭ شەشىمىمەن 1990 جىلدان باستاپ 1 ناۋرىز كۇنى دۇنيەجۇزىلىك ازاماتتىق قورعانىس كۇنى بولىپ اتاپ وتىلۋدە. قازاقستان رەسپۋبليكاسى 1996 جىلى حاقۇ مۇشەلىگىنە كىرىپ، حالىقتى، اۋماقتى جانە شارۋاشىلىق جۇرگىزۋ وبەكتىلەردى تابيعي جانە تەحنوگەندىك سيپاتتاعى توتەنشە جاعدايلاردان قورعاۋ ماسەلەلەرىن شەشۋ بويىنشا حالىقارالىق دەڭگەيدە بەلسەندى ىنتىماقتاستىقتى جۇزەگە اسىرادى.