بۇل شارالارعا 50-گە جۋىق ەرىكتى قاتىسىپ جاتىر.
جاڭا جىل قارساڭىندا قايىرىمدىلىق شارالارى جۇيەلى تۇردە وتكىزىلىپ تۇرادى. جىل سايىن ۆولونتەرلەر حالىقتىڭ ءارتۇرلى ساناتتارىن قامتۋعا تىرىسادى. وسى باعىتتا اتقارىلىپ جاتقان جۇمىستارعا وڭىرلىك كوممۋنيكاسيالار قىزمەتى الاڭىندا «QAMQOR CHARITY» قوعامدىق قورىنىڭ ءتورايىمى، الماتى قالاسى اكىمى جانىنداعى جاستار كەڭەسىنىڭ مۇشەسى باعدات اناربايەۆا مەن الماتى قالاسى جاستار رەسۋرستىق ورتالىقتارىمەن جۇمىس ءبولىمىنىڭ باسشىسى جانار ارنايەۆا توقتالدى، دەپ حابارلايدى Almaty-akshamy.kz.
جاڭا جىل قارساڭىنلا ۆولونتەرلەر بالالار مەن جالعىزباستى زەينەتكەرلەردىڭ قاۋانىشىن بولىسەدى. الماتىنىڭ بالالار ۇيىندە دەمەۋشىلەردىڭ قولداۋىمەن اياز اتاعا جازىلعان حاتتار نەگىزىندە بالالارعا سىيلىقتار بەرىلەدى.
«جاڭا جىل – ەڭ الدىمەن وتباسىلىق مەرەكە. سوندىقتان مۇندا كوپتەگەن ۆولونتەرلىك ۇيىمدار مۇقتاج وتباسىلاردى قۇتتىقتايدى، ءبىراق ءبىزدىڭ ۇيىم بۇل مەرەكەنى وتباسىمەن بىرگە تويلاۋعا مۇمكىندىگى جوق ادامدارعا قامتۋدى ماقسات ەتىپ وتىر. سوندىقتان وسى قۇتتىقتاۋ اياسىندا نەگىزگى ساناتتار رەتىندە ءبىز جالعىزباستى زەينەتكەرلەردى، سونداي-اق اتا-اناسىنىڭ قامقورلىعىنسىز قالعان بالالاردى تاڭدادىق»، - دەدى «QAMQOR CHARITY» قق ءتورايىمى.
سپيكەرلەردىڭ اتاپ وتۋىنشە، مەيىرىمدىلەر كلۋبىنىڭ باستاماسىمەن كەشە الماتى قالاسىنىڭ ارداگەرلەر ۇيىندە قۇتتىقتاۋ اكسياسى ءوتتى. كونسەرتتىك باعدارلامالار ۇيىمداستىرىلىپ، سىيلىقتار تابىستالدى. بۇگىن بالالاردى قۇتتىقتاۋ باستالدى، 30-31-نە قاراي ءوز ۇيلەرىندە تۇرىپ جاتقان جالعىزباستى زەينەتكەرلەردى قۇتتىقتاۋدى جوسپارلانىپ وتىر.
«الماتىدا قايىرىمدىلىق شارالارى مەن قۇتتىقتاۋ شارالارىن ءوز دەڭگەيىندە ۇيىمداستىراتىن 30-دان استام ءىرى ۆولونتەرلىك ۇيىم بار. ءبىزدىڭ اكسيالارىمىزعا 50-گە جۋىق ەرىكتى قاتىسۋدا. كوبىنە ولار ۇيىمداستىرۋ ساتتەرىندە، سىيلىقتاردى تاڭداۋ مەن ساتىپ الۋعا كومەكتەسەدى»، - دەدى ب.اناربايەۆا.
بريفينگ سوڭىندا سپيكەرلەر بۇل اكسيالاردىڭ جىل سايىن وتكىزىلەتىنىن جانە ءار جىلى ولاردىڭ نىسانالى اۋديتورياسى وزگەرىپ وتىراتىنىن ايتتى.
«ءبىزدىڭ اكسيامىزدى قالامىزدىڭ كاسىپكەرلەرى قولداپ وتىر. ولار ءبىزدىڭ زەينەتكەرلەرگە دە، بالالارعا دا سىيلىق الۋعا كومەكتەسەدى. اكسيالاردى ۆولونتەرلىك ۇيىمدار ۇيىمداستىرادى، ءبىراق دەمەۋشىلەر قارجىلاندىرادى. الماتى قالاسىنىڭ اكىمدىگى ءوز تاراپىنان بۇل شارالاردى ۇيىمداستىرۋعا تۇراقتى تۇردە قولداۋ كورسەتىپ كەلەدى»، - دەپ تۇيىندەدى ءسوزىن ب.اناربايەۆا.