الماتى وڭىرلىك كوممۋنيكاسيالار قىزمەتىنىڭ الاڭىندا18 ماۋسىمدا ق ر مادەنيەت جانە سپورت ۆيسە-مينيسترى نۇرقيسا داۋەشوۆ بولدى. ول "سالەم، ەلوردا!” II رەسپۋبليكالىق ونەر شەرۋى تۋرالى ايتتى.
مادەني شارا قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي، سونداي-اق قازاقتىڭ ۇلى اقىنى جامبىل جابايەۆتىڭ 175 جىلدىعى مەن باسقا دا ماڭىزدى مەرەيتويلىق كۇندەرگە ارنالدى. الماتىدا شەرۋ 22-24 ماۋسىم ارالىعىندا وتەدى.
"ونەر شەرۋى ءار ءوڭىردىڭ مادەنيەت سالاسىنداعى جەتىستىكتەرىن ناسيحاتتاۋعا مۇمكىندىك بەرەدى، سونداي-اق ەلىمىزدىڭ ۇزدىك ورىنداۋشىلارىنا قولداۋ كورسەتەدى. سونىمەن قاتار جوبا "رۋحاني جاڭعىرۋ" باعدارلاماسى اياسىندا مادەني قۇندىلىقتارىمىزدى دارىپتەۋگە باعىتتالعان"، – دەدى ۆيسە-مينيستر.
ن. داۋەشوۆتىڭ ايتۋىنشا، بيىل "سالەم، ەلوردا!" شەرۋى رەسپۋبليكامىزدىڭ ءتورت وڭىرىندە – وڭتۇستىكتە، سولتۇستىكتە، باتىس پەن شىعىستا وتەدى. جوبا وسى جىلدىڭ سوڭىنا قاراي نۇر-سۇلتان قالاسىندا تاۋەلسىزدىكتىڭ 30 جىلدىعىنا ارنالعان گالا-كونسەرتپەن اياقتالادى.
"22-24 ماۋسىم ارالىعىندا “سالەم، ەلوردا!" شەرۋى الماتى وبلىسى مەن الماتى قالاسىندا وتەدى. ءىس-شارا 22 ماۋسىمدا الماتى وبلىسى جامبىل اۋدانىنداعى اقىن جامبىل جابايەۆ ەسكەرتكىشىنە گۇل شوقتارىن قويۋ راسىمىنەن باستالادى. بارشاڭىزدى ونەر شەرۋىنىڭ ءۇش كۇندىك ءىس-شارالارىنا قاتىسۋعا جانە بىزبەن بىرگە بولۋعا شاقىرامىن"، – دەدى ن. داۋەشوۆ.
ونلاين-بريفينگكە جوبانىڭ باسقا دا ۇيىمداستىرۋشىلارى قاتىستى. ولاردىڭ اراسىندا "قازاقكونسەرت" ديرەكتورى جەڭىس سەيدوللا ۇلى دا بار.
ونىڭ ايتۋىنشا، جوبانىڭ باسقا ارت-وقيعالاردان ايىرماشىلىعى ءار ءوڭىردىڭ ارتىستەرىنە ەرەكشە كوڭىل بولىنەدى. “سالەم، ەلوردا!" كونسەرتتىك باعدارلاماسىندا قويىلىمدار عانا ەمەس، سونداي-اق وبلىستىق فيلارمونيا مەن مادەني ۇيىم قىزمەتكەرلەرى ءۇشىن شەبەرلىك سىنىپتارى وتەدى.