2025 جىلى الماتىدا تاۋ ينفراقۇرىلىمىن دامىتۋ قارقىندى تۇردە جالعاسىپ جاتىر. قالادا 1 مىڭ شاقىرىمنان استام تاۋداعى جۇرگىنشى باعىتتارى سيفرلاندىرىلدى، ونىڭ ىشىندە 750 شاقىرىمعا جۋىق بولىگى اباتتاندىرىلدى. 7 كەمپينگ ايماعى قۇرىلدى، سونداي-اق اۋقىمدى پوليگرافيالىق جانە سيفرلىق ماتەريالدار دايىندالدى. بۇل تۋرالى الماتى قالاسى تۋريزم باسقارماسىنىڭ وكىلدەرى حابارلادى.
بيىل 10 باسىم تاۋ باعىتى كوركەيتىلىپ جاتىر (ونىڭ ىشىندە كوكجايلاۋ جوتاسىنا كوتەرىلەتىن باعىتتار، "نۇرلىتاۋ" ماڭىنان باستالاتىن سوقپاقتار، بۋتاكوۆكا باعىتى، "حالىق سوقپاعى"، كىماسار مەن "پانوراما" باعىتتارى جانە ت.ب.). جۇمىس اياسىندا ناۆيگاسيالىق كورسەتكىشتەر، اقپاراتتىق تاقتالار، ءتۇرلى-تۇستى باعىتتىق بەلگىلەر، دەمالىس الاڭقايلارى، ورىندىقتار، قورشاۋلار مەن قاۋىپسىزدىك ەلەمەنتتەرى ورناتىلدى. سوقپاقتاردا قۇلاما تاستاردان قورعاۋ قۇرىلعىلارى، اعاش وتكەلدەر، باسپالداقتار جانە ارنايى دەمالىس الاڭدارى جاساقتالدى.
الما-اراسان شيپالى بۇلاعى ماڭىنداعى كەشەندى قايتا جاڭعىرتۋ اياقتالدى. 775 مەترلىك جۇرگىنشىلەر سوقپاعى قايتا اباتتاندىرىلىپ، ەڭىس بولىكتەرى بەكىتىلدى، كوپىرلەر قالپىنا كەلتىرىلدى جانە قاۋىپسىزدىك ەلەمەنتتەرى ورناتىلدى.
قولجەتىمدىلىكتى ارتتىرۋ ءۇشىن جالپى تيراجى 27 500 دانادان تۇراتىن باسپا ونىمدەرى (اتلاس، كارتا جانە گيد-بروشيۋرا) دايىندالدى. سونىمەن قاتار ءۇش تىلدە برايل قارپىمەن ماتەريالدار ازىرلەندى. 110-نان استام تۋريستىك نىسان مەن 10 مارشرۋتتى قامتيتىن اۋديوگيد بەس تىلدە جاسالدى.
تۋريزم باسقارماسى تاۋ ينفراقۇرىلىمىن دامىتۋ جانە سيفرلىق سەرۆيستەردى ەنگىزۋ الماتىنى بەلسەندى دەمالىستى ۇناتاتىن ازاماتتار ءۇشىن ءقاۋىپسىز ءارى تارتىمدى ەتە تۇسەتىنىن اتاپ ءوتتى. بۇل ەكوتۋريزم سالاسىندا جاڭا ونىمدەر قالىپتاستىرۋعا جانە تۋريستەردىڭ قالاعا دەگەن قىزىعۋشىلىعىن ارتتىرۋعا ىقپال ەتەدى.
سونىمەن بىرگە تۋريستەرگە تاۋدا قاۋىپسىزدىك ەرەجەلەرىن ساقتاۋدى، اۋا رايىن مۇقيات قاداعالاۋدى جانە ارنايى دايىندىقسىز نەمەسە ءتيىستى جابدىقسىز شىقپاۋ قاجەتتىگى ەسكەرتىلەدى.