الماتى تاۋلارىندا تۋريستەردىڭ قاۋىپسىزدىگى ءۇشىن ۇيشىكتەر ورناتىلادى

مەدەۋدىڭ تومەنگى بولىگىندە ارقاندى ساياباق پەن دەنساۋلىق جولى سالىنۋدا.

مەگاپوليس اكىمى باقىتجان ساعىنتايەۆ تۋريستەردىڭ تاۋدا قاۋىپسىزدىگى مەن جايلى بولۋىن قامتاماسىز ەتەتىن شارالار كەشەنى تۋرالى ايتتى، دەپ حابارلايدى Almaty-akshamy.kz

باقىتجان ساعىنتايەۆ ءوزىنىڭ Instagram-داعى پاراقشاسىندا الماتىنىڭ تاۋ كلاستەرىنىڭ تۋريستىك الەۋەتىن دامىتۋدا ەڭ باستىسى تۋريستەر مەن الپينيستەردىڭ قاۋىپسىزدىگى مەن جايلىلىعى ەكەنىن اتاپ ايتتى.

جۇمىس ساپارى كەزىندە الماتى اكىمى مودۋلدىك قۇرىلىم سياقتى ۇيشىكتەردىڭ قالاي قۇراستىرىلىپ جاتقانىن تەكسەردى.

«قىزعىلت سارى ءتۇستى مودۋلدەردىڭ ءىشى جىلىتۋ پەشى، اپاتتىق جاعدايدا قاجەت جيناقپەن جابدىقتالعان. ىشىندە العاشقى كومەك كورسەتۋ جيناعى، مارشرۋت كارتاسى، ءموبيلدى قۇرىلعىنى قۋاتتاۋ ستانساسى، جىلى كورپە مەن ازىق-تۇلىك جيىنتىعى بار. شاتىردا SOS سپۋتنيكتىك سيگنالىن قۇتقارۋشىلار پۋلتىنە جىبەرەتىن دابىل تۇيمەلەرى بار راديورەلەلىك دىڭگەكتەر ورناتىلعان»، - دەپ جازدى باقىتجان ساعىنتايەۆ.

تاۋداعى قاۋىپسىزدىك شارالارى شەڭبەرىندە ۇلكەن الماتى مەن تۇيىق سۋ شاتقالدارىندا باقىلاۋ-قۇتقارۋ پۋنكتى اشىلادى. وندا تىكۇشاق الاڭىن اشۋ دا جوسپاردا بار. شىمبۇلاقتا قىسقى ماۋسىمعا دايىندىق جۇرگىزىلۋدە – شاڭعى تراسسالارى مەن قوناق ءۇي جاڭارتىلۋدا. سونداي-اق ۆيزيت-ورتالىق اشىلادى.

الماتى اكىمى Medeu Park Hotelء-دى قۇرۋ، جاڭارتىلعان Qazaq Auyl ەكوكەشەنى مەن الپينيستەردىڭ سۇيىكتى مەكەنى – تۇيىق سۋ شاتقالىنداعى گلەمپينگتى قۇرۋ جوبالارىمەن تانىستى.