بيىل تاۋ تۋريستەرىنىڭ سانى 4 ەسەگە ارتقان.
الماتى قالاسىنىڭ تۋريزم باسقارماسى باسشىسىنىڭ ورىنباسارى مارلەن مارالوۆ تاۋ ءتۋريزمىن ءقاۋىپسىز ەتۋدىڭ جاي-جاپسارى تۋرالى ايتتى، دەپ حابارلايدى Almaty-akshamy.kz.
وڭىرلىك كوممۋنيكاسيالار قىزمەتىندە وتكەن بريفينگتە بيىل تاۋ تۋريستەرىنىڭ سانى 4 ەسەگە ارتقانىن ايتتى. وسىعان بايلانىستى اكىمدىك الماتى تۇرعىندارى مەن قوناقتارىنىڭ ءقاۋىپسىز ءارى جايلى دەمالۋى ءۇشىن قاجەتتى جاعدايلار جاساۋ جوسپارىن ازىرلەدى. تاۋلى مارشرۋتتاردىڭ شالعاي توراپتىق ۋچاسكەلەرىندە جازدىڭ سوڭىنا دەيىن تۋريستەر پانالاۋ ءۇشىن 15 ۇيشىك سالىنادى.
ءاربىر ۇيشىكتە ىزدەستىرۋ، قۇتقارۋ قىزمەتتەرى ءۇشىن كارتاعا جانە GPS-كوورديناتتارعا بايلانعان رەپەرلىك باستىرما دا بولادى. توتەنشە جاعدايلار تۋىنداعان كەزدە نەمەسە اۋا-رايىنىڭ قيىن بولۋىنا بايلانىستى ۇيشىك تۋريستەر كۇتىپ، قاجەتتى كومەك جيىنتىعىن الۋعا مۇمكىندىك بەرەدى (العاشقى مەديسينالىق كومەك جيناعى، مارشرۋت كارتالارى، ءموبيلدى قۇرىلعىلاردى زاريادتاۋ ستانساسى، جىلى كورپە مەن بۇزىلمايتىن ازىق-تۇلىك جيىنتىعى).
ۇيشىكتىڭ جانىنا SOS سپۋتنيكتىك سيگنالىن قۇتقارۋشىلار پۋلتىنە ەنگىزۋ جۇيەسى بار دىڭگەكتەر ورناتىلادى. دىڭگەكتەر شۇعىل ارەكەت ەتۋ قىزمەتتەرىنە قاشىقتان قوسىلادى (تجد/112).
اپات سيگنالىن بەرۋگە ارنالعان بارلىق سپۋتنيكتىك جابدىقتار تاۋداعى ۇيشىك كونسترۋكسياسىنا بىرىكتىرىلەدى، سونداي-اق ماچتالار Wi-Fi فۋنكسياسىمەن جابدىقتالادى. بۇل جۇيە شالعاي تاۋلى مارشرۋتتاردا قيىن جاعدايعا تاپ بولعان تاجىريبەسىز، دايىن ەمەس تۋريستەرگە ارنالعان. پايدالانۋشى ينتەرفەيسى مينيمالدى-داۋىستىق قوڭىراۋ تۇيمەسى، بەينە قوڭىراۋ كامەراسى مەن بىرنەشە تىلدەگى نۇسقاۋلار بولادى.
قوسىمشا تۋريستىك ناۆيگاسيانىڭ ءبىرىڭعاي جۇيەسىن قۇرۋ مەن تاۋعا شىعۋعا ارنالعان سمارت-ناۆيگاتور تۇرىندەگى قوسىمشانى ىسكە قوسۋ بويىنشا جۇمىس جۇرگىزىلەدى. ول تجد بازاسىمەن ينتەگراسيالاناتىن بولادى.
بيىل كىشى جانە ۇلكەن الماتى شاتقالدارىندا 2 باقىلاۋ-قۇتقارۋ پۋنكتى سالىنادى. سونداي-اق العاش رەت قۇرىلعان 16 ادامنان تۇراتىن تاۋ قۇتقارۋشىلارىنىڭ جاساعى تاۋلىك بويى كەزەكشىلىك ەتەدى. "تۇيىقسۋ" شاتقالىندا قوسىمشا تىكۇشاق الاڭى سالىنادى.