تۋريستەر كوك جايلاۋ – كۇمبەل شىڭى باعىتىمەن جۇرگەن.
قۇتقارۋشىلار الماتى تاۋلارىندا جوعالىپ كەتكەن 4 ءتۋريستى ىزدەپ تاپتى، دەپ حابارلايدى Almaty-akshamy.kz
«4 ماۋسىم ساعات 19:05-تە تجم رەسپۋبليكالىق جەدەل-قۇتقارۋ جاساعىنىڭ (رجقج) كەزەكشى-ديسپەچەرلىك بولىمىنە مەدەۋ اۋدانىنداعى تاۋلاردا 4 تۋريست جوعالىپ كەتتى دەگەن حابارلاما ءتۇستى. تۋريستەر كوك جايلاۋ – كۇمبەل شىڭى باعىتىمەن جۇرگەن. كەرى قايتار جولدا گورەلنيك شاتقالىنا قاراي شىعىپ، جولدا اداسىپ كەتكەن. تۋريستەر تەلەفونمەن بايلانىستا بولىپ، گەولوكاسيا دەرەكتەرىن جىبەرە الدى. ساعات 20:00-دە 6 ادامنان تۇراتىن رجقج جەدەل توبى، ونىڭ ىشىندە ءبىر كينولوگيالىق ەسەپتوپ گورەلنيك شاتقالىنا تۋريستەردى ىزدەۋگە شىقتى. ساعات 22:55-تە تجم قۇتقارۋشىلارى زارداپ شەككەندەردى تاۋىپ الدى. قۋانىشقا وراي تۋريستەر مەديسينالىق كومەككە مۇقتاج بولعان جوق»، - دەلىنگەن توتەنشە جاعدايلار مينيسترلىگىنىڭ مالىمەتىندە.
وسىنداي قيىندىققا تاپ بولماس ءۇشىن قۇتقارۋشىلار سەرۋەندەۋ ەرەجەلەرىن ەسكە سالادى: «تاۋعا شىقپاس بۇرىن باعىتىڭىزدى مۇقيات زەرتتەڭىز، جالعىز جۇرمەڭىز، جولداستارىڭىزدى تانىس ەمەس ورتادا جالعىز تاستاماڭىز. باعىتتىڭ نەگىزگى بولىگىن كۇننىڭ ءبىرىنشى جارتىسىندا ءجۇرىپ وتۋگە تىرىسىڭىز، باعىتتان الشاقتاپ، وزگە جولدارعا (سوقپاق) شىقپاڭىز، جولدى قىسقارتپاڭىز».
كومەككە مۇقتاج بولعان جاعدايدا 112 نەمەسە 8(727) 372-15-60 («ق ر تجم رجقج» مم كەزەكشى-ديسپەچەرلىك ءبولىمى) نومىرلەرىنە قوڭىراۋ شالۋعا بولادى.