ول قاتتى توڭىپ قالعان، مەديسينالىق كومەككە مۇقتاج بولماعان.
الماتى قۇتقارۋشىلارى ىلە الاتاۋى تاۋلارىندا مانشۇك مامەتوۆا شىڭىنا جالعىز اتتانعان ەر ادامدى ىزدەستىرىپ تاپتى، دەپ حابارلايدى Almaty-akhamy.kz.
«رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى جوعالىپ كەتكەن ەر ادامدى م. مامەتوۆا شىڭىنىڭ مۇزدىعىنان تاپتى. ول بۇگىن رجقج قىزمەتكەرلەرىنىڭ جاياۋ توبىنىڭ مۇزدىقتى تەكسەرۋ كەزىندە تابىلدى. قاتتى توڭىپ قالعان وعان قۇتقارۋشىلار جىلى كيىم بەردى. مەديسينالىق كومەككە مۇقتاج بولعان جوق. قازىرگى ۋاقىتتا رجقج جەدەل توبى تاۋدان تۋريستپەن بىرگە ءتۇسىپ كەلە جاتىر»، - دەلىنگەن حابارلامادا.
قۇتقارۋشىلاردىڭ ايتۋىنشا، ەر ادامنىڭ الماتى تاۋلارىندا جوعالعانى تۋرالى حابارلاما 18 شىلدە كۇنى تۇسكەن.
«مانشۇك مامەتوۆا كولىندە تۇنەگەن 27 جاستاعى جاس جىگىت تاڭەرتەڭ شىڭعا كوتەرىلەتىنىن ايتقان. كەشكە جاقىن تۋريست دوسىنا حابارلاسىپ، شىڭدى باعىندىرعاندىعىن، دەگەنمەن وعان كومەك قاجەت ەكەندىگىن جانە وزدىگىنەن تۇسە المايتىندىعىن ەسكەرتكەن. وسىدان كەيىن ەر اداممەن بايلانىس ۇزىلگەن. وقيعا ورنىنا 1 بىرلىك اۆتوتەحنيكا، 6 ادامنان تۇراتىن رجقج جەدەل توبى شىقتى. رجقج قۇتقارۋشىلارى الپينيزم فەدەراسياسىنىڭ (تۇيىقسۋ بازاسى) الپينيستەرىمەن بىرلەسىپ، ىزدەستىرۋدى باستادى. الپينيستەردەن 2 ادام جۇمىلدىرىلدى. جەدەل توپ ر№ 6 كولىنە دەيىن جەتىپ، م.مامەتوۆا شىڭىنا قاراي جاياۋ ءجۇرىپ شىقتى»، – دەلىنگەن قازاقستان رەسپۋبليكاسى توتەنشە جاعدايلار مينيسترلىگىنىڭ باسپا ءسوز قىزمەتىنىڭ حابارلاماسىندا.
