قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان «الماتى - تاۋەلسىزدىكتىڭ التىن بەسىگى» اتتى قالالىق كورمە ءوتتى.
ق ر سۋرەتشىلەر وداعى الماتى قالاسى اكىمدىگىنىڭ قولداۋىمەن 19 قىركۇيەكتە قالا كۇنىندە باستالىپ، 10 كۇنگە سوزىلعان كەسكىندەمە بويىنشا قالالىق پلەنەر وتكىزگەن بولاتىن. سول ءىس-شارادا ورىندالعان جۇمىستار اتالمىش كورمەدە ۇسىنىلادى. جوباعا بارلىعى 15 سۋرەتشى قاتىستى. ولاردىڭ ىشىندە ق ر سۋرەتشىلەر وداعىنىڭ 10 مۇشەسى جانە ق ر سۋرەتشىلەر وداعى جانىنداعى جاس سۋرەتشىلەر وداعىنىڭ 5 مۇشەسى بار. بۇل بەس جاس سۋرەتشى - 1991 جىلى تۋىلعان، ياعني، تاۋەلسىزدىكتىڭ قۇرداستارى. جوبانىڭ ماقساتى قالا دامۋىنىڭ ءۇش كەزەڭىن كورسەتۋ بولىپ تابىلادى. ۆەرنىي قالاسىنىڭ دامۋىنىڭ ەرتە كەزەڭىندەگى قۇرىلىستار، ونىڭ ىشىندە ءحىح عاسىرداعى اعاش عيماراتتار بەينەلەنەدى. سونىمەن قاتار ساۋلەت ونەرىنىڭ وزىندىك ءستيلى بار ءارى قازىرگى ۋاقىتتا مەملەكەتتىڭ قورعاۋىنا الىنعان كەڭەستىك كەزەڭنىڭ كوپتەگەن عيماراتتارى جانە ءححى عاسىردىڭ يندۋسترياليزاسياسىن كورسەتەتىن نىساندار، جاڭا تەحنولوگيالارعا نەگىزدەلگەن تاۋەلسىزدىك كەزەڭىندەگى الماتىنىڭ جاڭا بەينەلەرىن كورسەتەدى.
سۋرەتشىلەرگە ارنايى ەكسكۋرسيا جۇرگىزىلىپ، ونىڭ بارىسىندا قاتىسۋشىلار كوپتەگەن قىزىقتى دۇنيەلەرمەن تانىستى. مىسالى، ۆەرنىي قالاسىنىڭ اعاش عيماراتتارىندا سەيسميكالىق تۇراقتىلىق ماسەلەسى قالاي شەشىلگەن؟ ول ءۇشىن ۇيلەردىڭ استىنا جەر سىلكىنىسىن سوندىرەتىن ارنايى جاستىعى بار جارتىلاي جەرتولەلەر سالىنعان ەكەن. بۇل ۇيلەردىڭ سۋرەتتەرىن كورمەدە كورۋگە بولادى. كەڭەستىك كەزەڭ قالانىڭ باستى بەلگىسىنە اينالعان عيماراتتارمەن جانە ەسكەرتكىشتەرمەن ۇسىنىلىپ وتىر.
2021 جىلى قايتا جوندەۋدەن وتكىزىلگەن مۇسىندەر ساياباعىن قامتيتىن ءا. قاستەيەۆ اتىنداعى مەملەكەتتىك ونەر مۇراجايى عيماراتىنىڭ قاسبەتى ءبىرىنشى رەت سۋرەتتەلدى. شىعىس اينالما جولى، نۇرلى تاۋ عيماراتتارى، حالىق ارەنا، جاڭا زامان تالابىنا سايكەس قالامىزدىڭ دامۋىن بىلدىرەتىن زاماناۋي كۆارتالدار سۋرەتشىلەردىڭ شىعارمالارىندا العاش رەت كورسەتىلىپ وتىر. بۇل جۇمىستار ەندى قالا تاريحىندا ماڭگى قالادى. كوركەم شىعارمالارداعى قالا كورىنىستەرى مەن ححI عاسىر سۋرەتشىلەرىنىڭ قازىرگى زامانعا دەگەن كوزقاراسىن بەينەلەيدى.