تۋريزم جانە سپورت مينيسترلىگى الماتى تاۋ كلاستەرى ءتۋريزمىن دامىتۋدىڭ 2025 – 2029 جىلدارعا ارنالعان كەشەندى جوسپارىن بەكىتۋ تۋرالى بۇيرىق جوباسىن ازىرلەدى. قۇجات «اشىق نقا» پورتالىندا جاريالاندى.
قۇجاتتىڭ تۇسىندىرمە جازباسىندا اتالعان جوبانى قابىلداۋ الماتى قالاسى مەن الماتى وبلىسىنىڭ اۋماعىندا جانە تۇتاستاي العاندا ەلىمىزدە تۋريستىك سالانى دامىتۋعا، سونداي-اق تۋريستىك اعىمدى ۇلعايتۋعا سەپتىگىن تيگىزەتىنى ايتىلعان، دەپ حابارلايدى aqshamnews.kz
سونىمەن قاتار قازاقستاننىڭ ءتۋريزمدى دامىتۋ باعىتىنداعى ۇستانىمىنا وڭ اسەر ەتەدى، قولايلى ينۆەستيسيالىق احۋال جاسايدى.
سونداي-اق مينيسترلىك جوبا ەلىمىزگە تەرىس الەۋمەتتىك-ەكونوميكالىق جانە قۇقىقتىق سالدارعا اكەلمەيدى دەپ سەندىرىپ وتىر.
ايتا كەتسەك، الماتىدا تاۋ ءتۋريزمىن دامىتۋعا ارنالعان بەسجىلدىق كەشەندى جوسپاردى ىسكە اسىرۋعا رەسپۋبليكالىق جانە جەرگىلىكتى بيۋدجەتتەن قاراجات بولىنەدى.
الماتى تاۋ كلاستەرى ءتۋريزمىن دامىتۋ جوسپارىنان قانداي ناتيجە كۇتىلەدى:
- شەتەلدىك تۋريستەر سانىنىڭ 630 مىڭنان 1،8 ملن ادامعا دەيىن ارتۋى؛
- تۋريزم سالاسىندا جۇمىس ىستەيتىن جانداردىڭ 80،9 مىڭنان 106 مىڭ ادامعا دەيىن ارتۋى؛
- جەكە ينۆەستيسيا كولەمى 196،3 ملرد تەڭگەگە جەتەدى؛
- سالىقتىق تۇسىمدەردىڭ 90،7 ملرد تەڭگەدەن 184،3 ملرد تەڭگەگە دەيىن ارتۋى؛
قۇجات جوباسى 19 اقپانعا دەيىن قوعامدىق تالقىلاۋعا ۇسىنىلىپ وتىر.