حالىقارالىق IQAir كومپانياسى جاساعان رەيتينگكە الەمنىڭ 125 ءىرى قالاسى كىرگەن.
الماتى قالاسى تاعى دا اۋا ساپاسى ناشار قالالار تىزىمىنە ەندى، دەپ حابارلايدى aqshamnews.kz
Energyprom مالىمەتىنشە، بيىلعى مامىر ايىنىڭ ەكىنشى جارتىسىندا الماتى بۇل تىزىمدە 42-ورىننان كورىندى. قالاداعى اۋانىڭ لاستانۋ دەڭگەيى – ورتاشا، ال اۋا ساپاسىنىڭ يندەكسى – 61.
بىلتىرعى دەرەكتەرمەن سالىستىرعاندا، مامىر ايى – ەڭ ناشار كەزەڭ ەمەس. الماتىدا اۋا ساپاسى ەڭ كۇرت ناشارلايتىن ۋاقىت – جەلتوقسان مەن ناۋرىز ارالىعى، ياعني قىستىڭ ەڭ سۋىق كەزەڭى. وتكەن جىلدىڭ قاڭتار ايىنىڭ ورتاسىندا الماتى ءتىپتى ناقتى ۋاقىتتاعى رەيتينگتە الەمدەگى ەڭ لاس قالا رەتىندە تىركەلىپ، يندەكس 250-دەن اسقان بولاتىن. اۋا رايى جىلىنىپ، قىس اياقتالعان سوڭ دا جاعداي ءبىرشاما جاقسارمايدى. بۇل – وڭتۇستىك استانا ءۇشىن جىل سايىن قايتالاناتىن ەكولوگيالىق ماسەلە.
«قازگيدرومەت» رمك ماماندارى الماتىنى اتموسفەرالىق اۋانىڭ جوعارى جانە وتە جوعارى لاستانۋ دەڭگەيى بار قالالار قاتارىنا جاتقىزادى. مۇنداي قورىتىندى ەكى ەكولوگيالىق كورسەتكىش – ستاندارتتى يندەكس جانە لاستانۋدىڭ ەڭ جوعارى جيىلىگى نەگىزىندە جاسالعان. سوڭعى بىرنەشە جىلدا الماتىدا ستاندارتتى يندەكس كورسەتكىشى تۇراقتى تۇردە 5-تەن 10-عا دەيىنگى ارالىقتا تىركەلىپ، جوعارى لاستانۋ دەڭگەيىنە ساي كەلگەن. 2023 جىلى بۇل كورسەتكىش 15،6-عا دەيىن جەتىپ، وتە جوعارى دەڭگەيگە جەتكەن.
ەڭ جوعارى جيىلىكككورسەتكىشى بويىنشا دا جاعداي ۇقساس: الماتىدا بۇل كورسەتكىش 20%-دان جوعارى بولسا – جوعارى، ال 50%-دان اسقاندا – وتە جوعارى دەڭگەيگە سايكەس كەلەدى. بۇل كورسەتكىشتەردىڭ ءجيى قايتالانۋى الماتى اۋاسىنىڭ تۇراقتى تۇردە لاستاناتىنىن بىلدىرەدى.
اۋانىڭ لاستانۋىنا نەگىزگى سەبەپ – اۆتوكولىك. بۇل تەك بولجام ەمەس، الماتى قالاسى بويىنشا شەكتى رۇقسات ەتىلگەن شىعارىندىلار تۋرالى ەسەپكە ەنگەن ناقتى دەرەك. ۇكىمەت جاريالاعان قۇجاتقا سايكەس، جىلدىق 189 مىڭ توننا شىعارىندىلار كولەمىنىڭ 112،7 مىڭ تونناسى نەمەسە 59،6%-ى اۆتوكولىك ۇلەسىندە. تاعى 52،1 مىڭ توننا نەمەسە 25%-عا جۋىعى – ستاسيونارلىق كوزدەردەن شىعاتىن زياندى زاتتار.