قازيتۋ-دا اشىق اسپان استىندا كينو كەشى ءوتتى.
ەلىمىزدىڭ جوعارى وقۋ ورىندارى جاڭا وقۋ جىلىن ءداستۇرلى وقۋ فورماتىندا باستادى. قازاقستان ينجەنەرلىك-تەحنولوگيالىق ۋنيۆەرسيتەتىنىڭ جاستار ساياساتى دەپارتامەنتى دە ستۋدەنتتىك ءىس-شارالاردى ونلاين جانە وففلاين فورماتتا جۇرگىزىپ جاتىر. 26 قىركۇيەكتە قازيتۋ ستۋدەنتتەرى اشىق اسپان اياسىندا كينو تاماشالاۋ مۇمكىندىگىنە يە بولدى، دەپ حابارلايدى Almaty-akshamy.kz اتالعان ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.
شاراعا كەلگەن كورەرمەن ستۋدەنتتەر بارلىق كارانتيندىك شارالار قاتاڭ ساقتالعان. جاستار ۇيىمدارى كوميتەتى مەن ستۋدەنتتىك كەڭەس ۇيىمداستىرعان كينو كورسەتىلىمنىڭ الدىندا الەۋمەتتىك جەلىدە ساۋالناما جۇرگىزىلىپ ستۋدەنتتەر وزدەرى كورگىسى كەلەتىن كينولاردى تاڭداپتى. ەڭ كوپ داۋىس جيناعان كينونى ستۋدەنتتەر قازيتۋ فۋتبول الاڭىندا تاماشالادى. كەش بارىسىندا قىزىقتى ۆيكتورينالىق سۇراقتار مەن بي جارىسى بولىپ، ستۋدەنتتەر كوڭىلىن كوتەردى. كينو كەشىنە كەلگەن ستۋدەنتتەر ۇيىمداستىرۋشىلارعا ريزاشىلىقتارىن جەتكىزدى.
«اپتا سايىن ءار ءتۇرلى ءىس-شارالار وتۋدە. مىسالعا، ءبىز «ستۋدەنتتەر ۇيىندە» تۇراتىن قۇرداستارىمىزبەن بىرگە الدىڭعى اپتادا وتكەن «Apple fest» فەستيۆالىنە قاتىسىپ، «ەڭ ۇزدىك توپ» نوميناسياسىن جەڭىپ الدىق. بۇل جولى كينو كورۋگە كەلدىك. باستىسى بارلىعى ستۋدەنتتەر ءۇشىن تەگىن. اشىق اسپاندا كينو كورۋ اتموسفەراسى كەرەمەت بولدى. وسىنداي ءىس-شارالار اۋىزبىرشىلىگىمىزدى ارتتىرىپ، كوڭىل-كۇيدى كوتەرىپ، جانىڭا جىلىلىق سىيلايدى» - دەيدى 2 كۋرس ستۋدەنتى ايگەرىم حالييەۆا.
«مەن اقتوبە قالاسىنان كەلدىم. الماتىنىڭ تابيعاتى ەرەكەشە اسەر قالدىردى. سونىڭ ىشىندە ءبىزدىڭ ۋنيۆەرسيتەتىمىز ەكولوگيالىق تازا اۋداندا ورنالاسقان. الاتاۋدان ەسكەن سالقىن سامالمەن تىنىستاپ اشىق اسپان استىندا كينو كورىپ كەرەمەت اسەر الدىق. ۇيىمداستىرۋشىلارعا راحمەت!» - دەپ 1 كۋرس ستۋدەنتى حازرەتالى اماندىقوۆ ءوز پىكىرىن ءبىلدىردى.
«ءبىز جاستار ۇيىمدارى كوميتەتىنىڭ بەلسەندىلەرىمەن بىرگىپ، ءار جۇما سايىن اشىق اسپان استىندا ءىس-شارا وتكىزۋدى جوسپارلادىق. وقۋ جىلىنىڭ باسىنان بەرى بۇل تازا اۋادا ۇيىمداستىرىلعان ءۇشىنشى شارامىز. قازىرگى تاڭدا كارانتين ۋاقىتى بولعاندىقتان، بۇرىنعىداي كوپ ادامدى جيناپ مەكەمە ىشىندە كەشتەر ۇيىمداستىرۋعا بولمايدى. سول سەبەپتى ءبىز تازا اۋادا وتكىزۋ فورماتىن تاڭدادىق. ستۋدەنتتەردىڭ بارلىعى ماسكالىق رەجيمدى ساقتاۋىن قاداعالايمىز. الداعى جوسپارىمىزدا ستۋدەنتتىك كۆەست «Autumn party» جانە ءار ءتۇرلى تيمبيلدينگتەر بار»، - دەيدى جاستار ساياساتى دەپارتامەنتىنىڭ مامانى مەرۋەرت باتاي.