الماتىدا Satpaev University ستۋدەنتتەرى ءۇشىن سالىناتىن توعىز قاباتتى جاڭا جاتاقحانانىڭ ىرگەتاسىنا كاپسۋلا سالۋ ءراسىمى ءوتتى.
ءىس-شارا مەملەكەتتىك ستۋدەنتتەردى جاتاقحانامەن قامتاماسىز ەتۋ باعدارلاماسى اياسىندا، قازاقستان رەسپۋبليكاسى عىلىم جانە جوعارى ءبىلىم مينيسترلىگىنە قاراستى «قارجى ورتالىعى» اق قاتىسۋىمەن ۇيىمداستىرىلدى.
سالتاناتتى راسىمگە الماتى قالاسى جاستار ساياساتى باسقارماسىنىڭ باسشىسى ءازيز قاجدەنبەك، Satpaev University باسشىلىعى مەن بەلسەندىلەرى، سونداي-اق جوباعا ينۆەستيسيا سالعان كومپانيالاردىڭ وكىلدەرى قاتىستى.
جينالعاندار مەن ۋنيۆەرسيتەتتىڭ ارداگەر وقىتۋشىلارى جوبانىڭ باستالۋىمەن قۇتتىقتاپ، ستۋدەنتتەردىڭ جاڭا جاتاقحاناعا جوسپارلانعان مەرزىمدە، ياعني 2026 جىلدىڭ باسىندا كوشىپ بارۋىنا تىلەك ءبىلدىردى.
- جاڭا جاتاقحانا 319 تۇرعىن بولمەدەن تۇرادى جانە 955 ستۋدەنتكە ارنالعان. توعىز قاباتتى عيماراتتىڭ جالپى اۋدانى – 11 مىڭ شارشى مەتردەن اسادى، ال قۇرىلىس الاڭى – شامامەن 1 گەكتار. سونداي-اق، 15 كولىككە ارنالعان تۇراق قاراستىرىلعان.
– بۇل قۇرىلىس وتكەن جىلى اشىلعان جاتاقحانالار سالۋ بويىنشا جوبالىق كەڭسە اياسىندا جۇزەگە اسىرىلۋدا. جوبا مەملەكەت باسشىسىنىڭ بەس باستاماسى شەڭبەرىندە ىسكە اسىرىلىپ، «قارجى ورتالىعى» اق قاتىسۋىمەن سۋبسيديالانادى، – دەپ اتاپ ءوتتى جاستار ساياساتى باسقارماسىنىڭ باسشىسى ءازيز قاجدەنبەك.
ءازيز قاجدەنبەكتىڭ ايتۋىنشا، مەگاپوليس ستۋدەنتتەرى ءۇشىن جاتاقحانا ماسەلەسى وزەكتى بولىپ قالا بەرەدى. بيىلعى وقۋ جىلى باستالعالى بەرى 1600 ورىن اشىلدى.
- جىل سوڭىنا دەيىن الماتىدا جالپى سانى 4500 ورىندىق جاڭا جاتاقحانالار پايدالانۋعا بەرىلمەك. سالىستىرمالى تۇردە الساق، 2023 جىلى 4000 جاڭا ورىن اشىلعان ەدى، ال 2025 جىلى بۇل كورسەتكىش ودان ءارى ارتادى دەپ كۇتىلۋدە.