الماتى سپورت باسقارماسىنىڭ باسشىسى قىزمەتىنەن كەتەتىنىن مالىمدەدى

ءبارى بولدى: جەڭىس پەن جەڭىلىس، وكىنىش پەن قۋانىش

الماتى قالالىق سپورت باسقارماسىنىڭ باسشىسى رۇستەم بايسەيتوۆ دەنساۋلىعىنا بايلانىستى قىزمەتىنەن كەتەدى. ول تۋرالى ءوزىنىڭ ءىnstagram پاراقشاسىنا جازدى، دەپ حابارلايدى Almaty-akshamy.kz.

رۇستەم بايسەيتوۆتىڭ حابارلاۋىنشا، قاڭتار وقيعاسى كەزىندە تيگەن وقتىڭ جاراقاتى ونى الاڭداتىپ وتىر جانە جۇمىس قابىلەتى ءالى قالپىنا كەلمەگەن.

«بىلەكتىڭ قوزعالىس بەلسەندىلىگىن قالپىنا كەلتىرۋ مەن وڭالتۋدىڭ تولىققاندى كۋرسىنان ءوتۋ كەرەك بولعان سوڭ، الماتى قالاسى سپورت باسقارماسىنىڭ باسشىسى لاۋازىمىن بوساتىپ، دەنساۋلىعىممەن اينالىسۋعا شەشىم قابىلدادىم»، - دەپ جازدى ول.

رۇستەم بايسەيتوۆ، سونداي-اق 2018 جىلدىڭ شىلدە ايىنان باستاپ الماتىلىقتارمەن بىرگە ءبىرشاما جەتىستىكتەرگە جەتكەنىن جازدى.

«ءبارى بولدى: جەڭىس پەن جەڭىلىس، وكىنىش پەن قۋانىش. قوعامدىق ساۋالناما مەن ۇوك مويىنداۋى بويىنشا الماتى قالاسى سوڭعى ءتورت جىلداعى بارلىق كەشەندى رەسپۋبليكالىق جازعى جانە قىسقى سپارتاكيادالاردىڭ، وليمپيادالىق سيكل ويىندارى مەن جارىستارىنىڭ جەڭىمپازى، ۇزدىك سپورت ءوڭىرى اتاندى. قالا باسشىلىعىنىڭ قولداۋىمەن جان باسىنا قارجىلاندىرۋ، سپورت ينفراقۇرىلىمىن ارتتىرۋ بويىنشا ماڭىزدى الەۋمەتتىك جوبالار ىسكە استى، قالا اۋداندارىنداعى 6 سپورت كەشەنىنىڭ 3-ەۋى ءىس جۇزىندە اياقتالدى. وسى جىلدار بويى جەڭىسكە جەتۋدە سىزدەرمەن بىرگە جۇرگەنىمدى ماقتان تۇتامىن»، - دەپ جازدى ول.

ءسوز سوڭىندا ر.بايسەيتوۆ سپورتتىڭ ءوز ومىرىندە ەرەكشە ورىن الاتىنىن، ۇزاققا سوزىلمايتىن وڭالتۋدان سوڭ الماتىلىقتارمەن باسقا جوسپارلارىمەن بىرگە قايتا كەزدەسۋگە ءۇمىتتى ەكەنىن ايتىپ، بارلىق قولداۋ بىلدىرگەندەرگە العىسىن جەتكىزدى.