ماماندار قالا تۇرعىندارىن ەكپە الۋعا شاقىردى.
الماتى قالاسى «سارى» ايماققا اۋىستى. بۇل تۋرالى دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ ءمالىم ەتتى، دەپ حابارلايدى Almaty-akshamy.kz.
«4 شىلدەدەن باستاپ الماتى قالاسى «سارى» ايماققا ءوتتى. قازىرگى ۋاقىتتا قالانىڭ مەملەكەتتىك باس سانيتار دارىگەرى قاۋلىنى دايارلاۋ ۇستىندە. قاۋلىدا بارلىعى جازىلادى. وسى ورايدا ءبىز ءار ازاماتتى كوروناۆيرۋسقا قارسى ۆاكسينا الۋعا جانە ريەۆاكسيناسيادان وتۋگە شاقىرامىز»، - دەدى ەرجان بايتانايەۆ قازاقپارات تىلشىسىنە تەلەفون ارقىلى.
ونىڭ ايتۋىنشا، بۇگىندە كوروناۆيرۋسقا شالدىعىپ جاتقان ازاماتتاردىڭ 80 پايىزى ۆاكسينا الماعان.
«قازاقستاندىقتاردى ءوزى مەن جاقىندارىنىڭ دەنساۋلىعىن ساقتاۋ ماقساتىندا ۆاكسينا الۋدىڭ بارلىق پروسەسىنەن وتۋگە شۇعىل تۇردە شاقىرامىز. بۇل پروسەسس ۇجىمدىق يممۋنيتەتتى قالىپتاستىرا ءتۇسۋ ءۇشىن دە ماڭىزدى»، - دەيدى ول.