ەرىكتىلەر كوشە تازالاۋشىلارعا ىستىق شاي مەن ءتاتتى توقاشتار ۇسىندى.
«الماتى SOS» جاستار قايىرىمدىلىق ۇيىمى بۇگىندە قالانى ارالاپ، كوممۋنالدىق قىزمەتشىلەردى جىلىتىپ، كوڭىلدەرىن كوتەرۋ ءۇشىن ىستىق شايمەن قامتاماسىز ەتۋدە. ۆولونتەر ايگەرىم قۋاتوۆانىڭ ايتۋىنشا، ولار بۇل اكسيا تۋرالى الەۋمەتتىك جەلىدە جازبا جاريالاپ، 250-دەن استام قامقور الماتىلىق ۇيىمعا كومەكتەسۋگە بەل بۋعان.
– ءبىزدىڭ ەرىكتىلەر تۋعان قالامىزدى رەتكە كەلتىرىپ جاتقان ازاماتتارعا العىسىن ءبىلدىردى. بۇل ۇسىنىسقا كوپتەگەن ادامدار قولداۋ ءبىلدىردى. كوپشىلىگى ازىق-تۇلىكپەن كومەكتەستى، باسقالارى اقشا اۋداردى. بارلىعىمىز باس قوسىپ، المالى، مەدەۋ اۋداندارىنداعى تازالاۋشىلاردى تاماقتاندىرۋدى ءجون كوردىك. باسىندا 15 ەرىكتى بولدى، ءبىراق بىزبەن بىرگە ءجۇرۋدى قالايتىندار كوپ بولدى. تازالىق جۇمىستارى قاي جەردە ءجۇرىپ جاتقانىن ءبىلۋ ءۇشىن قالاداعى كوممۋنالدىق مەكەمە باسشىلارىنا تەلەفون سوقتىق. وسىلايشا، الماتىلىقتاردىڭ اتىنان قايعىلى وقيعالاردان كەيىن كوشەلەردى قوقىستان تازارتىپ جاتقان ادامدارعا قولداۋ بىلدىرۋدەمىز»، - دەيدى الماتى SOS جاستار قايىرىمدىلىق ۇيىمىنىڭ ۆولونتەرى ايگەرىم قۋاتوۆا.
كۇنى بويى ولار 100-گە جۋىق ادامعا شايمەن قوسا قولدان پىسىرىلگەن بالىشتەر مەن سامسالاردى، ءتاتتى توقاشتاردى ۇسىندى.
– مۇنداي اكسياعا ءبىرىنشى رەت قاتىسىپ وتىرمىن. مەنى ءبىر دوسىم شاقىرعان بولاتىن، بۇل باستاماعا ۇلەس قوسامىن دەپ شەشتىم. تازالىق جۇمىستارى ءجۇرىپ جاتقان كوشەلەردى ارالاپ شىقتىق، باسشىلاردىڭ رۇقساتىمەن كوممۋنالدىق قىزمەتكەرلەرگە از ۋاقىت ءۇزىلىس بەرىپ، ىستىق ءشاي مەن توقاشتارمەن تاماقتاندىرامىز، – دەيدى جوبا جەتەكشىسى ۆالەريي زناموۆ.
ەرىكتىلەر اكسيانى الداعى كۇندەرى دە جالعاستىرىپ، ولارعا قوسىلۋعا شاقىرادى. قامقورلىق تانىتۋعا نيەتتى الماتىلىقتار Instagram ارقىلى حابارلاسا الادى: @almaty_sos