حالىقارالىق بالالاردى قورعاۋ كۇنىنە وراي AMANAT پارتياسى الماتى قالالىق فيليالى مەن قازاق مەملەكەتتىك سيركى وكىلدەرى الماتىلىق كىشكەنتاي دوستارعا ارناپ سيرك قويىلىمىن ۇيىمداستىردى.
مەرەكەلىك قويىلىمعا "الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعىنان"، "ءۇمىت" ساڭىراۋ مۇگەدەكتەردى قولداۋ ورتالىعىنان، "تاعدىر" مۇگەدەك بالالار وتباسىلىق كلۋبىنان، "بيىك بەلەسكە باعىت"، "ءۇمىتىڭدى ۇزبە"، "ارعىماق"، "انا تىلەگى"، "قايىرىمدىق كەرۋەنى"، "الاتاۋ انالارى"، "شىڭعا ورلەۋ" قورلارىنان، المالى، مەدەۋ، بوستاندىق، ناۋرىزباي، تۇركسىب، الاتاۋ اۋداندارىنىڭ مۇگەدەكتەر قوعامىنان، "ايالا"، "شاپاعات"، "پاراسات" الەۋمەتتىك قىزمەت كورسەتۋ ورتالىقتارىنان، "قازاقستان رەسپۋبليكاسىنىڭ ارداگەرلەر ۇيىمى"، "قامقورلىق ورتالىعى - حەسەد پولينا"، "قازاق زاعيپتار قوعامى"، "ەرەكشە بالالاردىڭ اتا-انالارى وداعى" قوعامدىق بىرلەستىكتەرىنەن، "نۇر" قايىرىمدىلىق وتباسىلىق بالالار ۇيىنەن جەتكىنشەكتەر شاقىرىلدى. سونداي-اق، سيركتى الماتىلىق وقۋ وزاتتارى، دارىندى بالالار، شىعارماشىلىق، وليمپيادا جانە سپورتتىق سايىستاردىڭ جەڭىمپازدارى، بارلىعى 100 بالا تاماشالادى.
الماتى سيركىنىڭ تورىندە بالالار الدىندا ەڭ بەدەلدى حالىقارالىق سيرك فەستيۆالدەرىنىڭ جەڭىمپاز ارتيستەرى ونەر كورسەتتى. اۋەدە قالىقتاعان گيمناستتاردىڭ، مانەجگە شىققان كوڭىلدى كلوۋنداردىڭ، ءتىپتى، سۇيكىمدى يتتەردىڭ، ەپتى مىسىقتاردىڭ، اقىلدى قونجىقتىڭ ونەرىنە ءماز بولا قول سوققان بالدىرعانداردىڭ قۋانىشىندا شەك بولعان جوق.
– بىزگە وسىنداي جارقىن ساتتەر سىيلاعان جاندارعا العىس ايتامىن. وسىناۋ ءومىردىڭ كۇندەلىكتى كۇيكى تىرلىگى بىتكەن بە، كىشكەنتاي قىزىم ءۇشىن ۋاقىتىمدى ءبولىپ كەلگەن ەدىم، وتە جاقسى اسەر الدىم. ءوزىم دە ءبىر سەرپىلىپ، دەمالىپ قالدىم. قىزىم ءماز بولىپ، تەلەديداردان كورىپ جۇرگەن ايۋىن بۇگىن كوزىمەن كورگەنىنە قۋانىپ، قايتا-قايتا قول شاپالاقتاپ وتىردى. مەن سەكىلدى ەرەكشە بالا تاربيەلەپ وتىرعان اتا-انالارعا سابىر، ءتوزىم جانە وسىنداي جاقسى كۇندەردىڭ مول بولۋىن تىلەيمىن، – دەيدى الماتىلىق ساۋلە سەرپەروۆا.
ءيا، بالا تابيعاتىنا الاڭسىز ءومىر، شاتتىق، قۋانىش ءتان عوي، ولار اسىرەسە، الەمگە ايگىلى "بەز نوسكوۆ" كلوۋن تريوسىنىڭ ونەرىنە ءتانتى بولىپ، ۇزاق قول سوعىپ وتىردى.
قۋانسا، بالا قۋانسىن!